«Oraindik ez dakigu nola erantzungo dugun, baina badakigu iragan hilabetean Errusiak Leipzigen egindako erasoak estatu terrorismoaren ezaugarri guztiak betetzen dituela». Hala mintzatu da Europako Batasuneko diplomaziaburu Kaja Kallas gaur goizean, Europako Batasuneko Atzerri ministroek Irlandan egiten ari diren bilera informalera sartu aurretik. Hortaz, EBk babes osoa adierazi dio Alemaniari, eta jakinarazi du aztertzen ari dela Errusiari beste zigor ekonomiko batzuk ere ezartzea.
Berlinek atzo ohartarazi zuen froga aski zituela esateko Mosku dagoela abuztuaren 4an Leipzigeko aireportuaren aurka drone bidez egindako erasoaren atzean. Gaur, Bruselak bat egin du adierazpen horiekin, eta EBko diplomaziaburuak esan du gertakariak Europa «esnatzeko deia» izan beharko lukeela. Hala, adierazi du zigor gehiago ezarri behar dituztela Errusiaren aurka, baita nabarmendu ere EBko herrialde orok «beste maila bateko» ahaleginak egin behar lituzketela Errusiak jokaera aldatu dezan.
EBko diplomaziaburuak azaldu du egoera aztertu dutela Atzerri ministroen bileran, eta Errusiaren aurkako neurrien indarraldia luzatzea eztabaidatu dutela. Gainera, atea zabalik utzi du Errusiako industria militarreko beste kargudun eta erakunde batzuk ere gehitzeko EBko zigor zerrendara —jada 1.600 izen baino gehiago daude hartan—. Dena den, Kallasek iragarri du hori ez dutela gaur erabakiko.
Bestalde, Bruselan, Europako Batzerreko presidente Ursula von der Leyen eta NATO Ipar Atlantikoko Itunaren Erakundeko idazkari nagusi Mark Rutte bildu egin dira gaur. Atzo, bai Von der Leyenek bai Ruttek gogor egin zuten Moskuren aurka beren sare sozialetan, Alemaniak Errusiari leporatu ostean Leipzigeko erasoa egin izana. Gaur, horren harira, bi erakundeetako buruak elkartu egin dira; esan dutenez, eztabaidatzeko ea nola aurre egin Europak jasaten dituen mehatxu hibridoei.
Bileratik ateratzean, Ruttek eta Von der Leyenek adierazi dute areagotu egingo dutela Errusiaren aurkako presioa. NATOko buruak, gainera, esan du Errusiak geroz eta jarrera «arduragabeagoa» duela, eta zera gehitu: «Errusiak uste badu mehatxuek banatu egingo gaituztela, edo Ukrainari laguntzea eragotziko digutela, oker dago. Gure batasuna ezin da desegin».
Von der Leyenek, gainera, ohartarazi du Errusiak EBko lurretan erasoak egin izanak «tentsioa areagotu» duela, eta Brusela «beste urrats bat egitera» behartu, «beste normaltasun bat» ezartzeko.
Alemaniak eskertu egin du EBk emandako erantzuna. Herrialde horretako Atzerri ministro Johann Wadephulek esan du «harrituta» dagoela nolako babesa jaso duten ikusita, eta Europako aliatuen arteko batasunaren «adierazpen esanguratsutzat» jo du.
Zelenski, Errusiako aire espazioa are gehiago urratzeko prest
Ukrainako presidente Volodimir Zelenskik atzo gauean adierazi zuen Errusiako aire espazioa ez dela «guztiz segurua». Hain zuzen ere, bere sare sozialetan, Errusiatik igarotzen diren aire konpainiei ohartarazi zien balitekeela ibilbide horiek «arriskutsuak» izatea.
Hala ere, Zelenskik berehala argitu zuen Ukrainak ez diela eraso egingo hegazkin zibilei, eta eskatu ez hartzeko azalpen horiek mehatxutzat, Errusiako zeruan droneak egongo direlako abisutzat baizik.
Errusiako presidente Vladimir Putinek atzo bertan erantzun zien Zelenskiren adierazpen horiei, eta «estatu terrorismoa» baino ez zirela esan. Gainera, Shanghaiko Lankidetza Erakundearen goi bileran zela, jakinarazi zuen «mehatxuak gauzatuz gero» erantzun egingo dutela; are, adierazi zuen Zelenskiren hitzek bake negoziazioak izateko aukerak zapuztu dituztela, eta «terroristekin» ez dutela negoziatzen.
Bestalde, bart gauean jasan duen eraso baten berri eman du Moskuk. Ukrainako armadak Belgorod eskualdea jo du artilleria eta drone bidez —Errusiako agintariek adierazi dute 140 aldiz egin diotela eraso—. Gutxienez bi lagun hil dira, eta hamasei zauritu.
Errusiak ez du adierazpenik egin ez EBren ez NATOren jarreraren inguruan, baina guztiz baztertu ditu Alemaniak atzo egin zizkion akusazioak. Atzo gauean, Errusiako presidente Vladimir Putinek estrategia politikotzat jo zuen Leipzigeko erasoa Moskuri leporatu izana, eta Alemaniako agintarien ospe galtzearekin lotu zuen, bereziki Friedrich Merz kantzilerraren egoerarekin. «Kantzilerra ataka politiko zailean dago. Ez du herritarren konfiantzarik. Eta argi dago zergatik: nazioaren interesak ez dituelako defendatzen», gehitu zuen Putinek Shanghaiko Lankidetza Erakundearen goi bileran, Kirgizistanen.
Gainera, Kremlineko buruak azpimarratu zuen ez dagoela Errusia erasoaren erantzule dela egiaztatzeko frogarik, eta aurretik Berlinek ere Moskuri leporatu izan diola Nord Stream gas hodiak sabotatzea. Reuters berri agentziak kaleratu du Moskuk biltzeko deia egin diola Alemaniako enbaxadoreari.
Ukraina ere mintzatu da egoeraren inguruan. Merzekin batzartu da gaur Ukrainako presidente Volodimir Zelenski, bideokonferentzia bidez, eta esan du Leipzigeko droneen erasoaren inguruan aritu direla. Sare sozialetan nabarmendu du Errusiaren jarduerak tirabirak areagotu dituela, eta adierazi Ukraina prest dagoela Alemaniari laguntzeko.
Bestalde, Zelenskik azaldu du bi herrialdeek droneei buruz egin asmo duten akordioaren inguruan ere eztabaidatu dutela bileran. Akordioaren edukiaz eta epeez aritu direla esan du, baita testua amaitzear dagoela iragarri ere.
Bi atxilotu Leipzigeko erasoaren harira
Alemaniako hedabideek kaleratu dutenez, bi lagun atxilotu dituzte gaur, Leipzigeko aireportuko erasoaldiarekin zerikusia izatea egotzita. Jakinarazi dutenez, biek nolabaiteko lotura dute Errusiarekin: bat Errusian jaiotakoa da, nahiz eta Letoniako pasaportea duen; bestea, berriz, Bielorrusiakoa da, baina Errusiako pasaportea du. Hedabideek adierazi dutenez, Alemaniako indarrek aurretik identifikatuta zeuzkaten atxilotuak.
