Gutxigatik bada ere, Suediako zentro-ezkerrak irabazi du legebiltzarrerako bozetan. Botoen %98 zenbatuta, bloke horrek botoen %49,5 ditu bilduak, eta eskuinekoak, %49,1. Eskuin muturrak lehen aldiz atzera egin du legebiltzarrerako bozetan, eta bigarren indarra izateari utzi dio, zenbatutako botoen %17,6 eskuratu baititu. Parte hartzea %80,4koa izan da.
Azken boto paperak eta atzerrikoak zenbatzea falta da, baina emaitza horiek berresten badira, Magdalena Andersson sozialdemokrata izango da lehen ministro zentro-ezkerreko alderdien babesarekin. Alderdi Sozialdemokratak botoen %28,1 bildu ditu —1928tik izandako emaitzarik txarrena—, baina, bere hiru aliatuen gorakadari esker, Andersson izango da lehen ministro. Ezkerra laugarren indarra izan da, botoen %8,2 eskuratuta. Zentroko Alderdiak eta Berdeek ere gora egin dute.
Ulf Kristersson orain arteko lehen ministroaren alderdi kontserbadoreak botoen %19,9 jaso ditu, eta SD Suediako Demokratak eskuin muturreko alderdiari aurrea hartu dio eskuineko blokean.
«Nire mezua argia da: sozialdemokratak beti egongo gara ardurak hartzeko prest. Emaitza estua da, baina orain aurretik goaz, eta horri eusten badiogu, Suediak beste gobernu bat izango du». Hori bai, Anderssonek lanak izango ditu orain zentro-ezkerreko blokeko bazkideak gobernua osatzeko konbentzitzeko. Zentroko Alderdiak esan du ez lukeela babestuko Ezkerreko kideak lituzkeen gobernurik, eta, gainera, demokristauak ere nahiko lituzke balizko gobernu batean —demokristauek adierazi dute, baina, ez dutela sozialdemokratak buru dituen gobernurik babestuko—. Eta Ezkerrak nabarmendu du oraingoan ez dela konformatuko kanpotik babesa emate hutsarekin.
Kristerssonek, berriz, esan du saiatuko dela beste gehiengo bat osatzen.
