«Azkenean». Pedro Sanchez Espainiako Gobernuko presidenteak hauteskundeak aurreratuko dituela jakinarazi ondoren egindako agerraldian, horixe esan du, hasteko, Alberto Nuñez Feijoo PPren presidenteak. Eta haren hitzetan, azaroaren 29an egitekoak diren hauteskundeetan, bozkatzaileek zirt edo zart egin beharko dute: «Aukeratu beharko dute ustelkeriaren eta garbitasunaren artean; dekadentziaren eta oparotasunaren artean».
Oposizioburua alderdiaren egoitza nagusian mintzatu da, eta nabarmendu du «espainiarrek erabakiko dutela azkenean», pentsatzen dutena esango dutela «azkenean». Garaia bazela azpimarratu nahi izan du finean, eta bozak plebiszitu bat direla. «Jokoan dago bizi izan duguna beste lau urtez bizitzea, edo aldaketari aukera bat ematea».
PPk planteatutako errealitatea kontuan hartuz, Sanchezen azken legegintzaldian —2023ko azarotik— ezin izan da eztabaidatu. «Azkenean, zure familiaz, zure etxeaz, zure bizitzaz hitz egingo dugu. Gure etorkizuna eraikiko dugu, eta murruak botako ditugu». Hori idatzi du PPk X-ko bere kontuan, eta Feijook auzi sozialei ere heldu die, horiek aipatuz: «Espainiarren zailtasunak pilatu dira azkeneko urteotan. Inoiz baino baliabide gehiago eduki ditu estatuak, eta, halere, etxebizitza eskuraezin dago, medikuak falta dira, grebak daude sobera, hezkuntza maila okerrera egiten ari da, eta immigrazioa kontroletik kanpo». PPko buruzagiaren esanetan, hauteskundeetara deitzea da Sanchezek gaur-gaurkoz eman zezakeen «albiste on bakarra».
Santiago Abascal Voxen burua ere mintzatu da Espainiako gobernuburuaren iragarpenaren ondoren, eta Ceutako krisian jarri du arreta. «Ceuta inbadituta dagoen bitartean deitu gaituzte bozkatzera», esan du Antena 3 telebista kateko programa batean egin dioten elkarrizketa batean. Eta ultraeskuineko liderra areago joan da: «Nik uste dut Sanchez dela hautagai marokoarra».
Abascal pozik dago Sanchezek bozak aurreraratu dituelako. «Bai gu, baina batez ere espainiarrak, aspalditik ari ginen hauteskundeak eskatzen». Inkestak alde dituzte, eta horiek aurreikusten dute Voxek diputatu kopuruan 2023an lortutakoak halako bi lortuko dituela —84 inguru—, eta PPk eta Voxek gehiengo osoa lortuko dutela. Abascalek esan du, ordea, ez dela inkestez fio, eta herritarrei eskatu die gauza bera egiteko. Bide batez, 2023an gertatutakoa gogoratu du. Izan ere, orduan ere gehiengo osoa ematen zieten eskuinei, baina, azkenean, Sanchezek lortu zuen, PSOEk bozak ez irabazi arren, gehiengo oso bat lortzea.
Isabel Diaz Ayuso Madrilgo erkidegoko presidenteak (PP), bestetik, iruzurraren mamua haizatu du, eskuin muturraren estiloan. «Mundu guztiari eskatzen diot ez dezala postaz bozkatu», esan du foro batean.
