Uholdeek eta luiziek bat-batean harrapatu zituzten atzo Nepalen eta Tibeten arteko mugaren inguruko eskualdeak, eta hondamenak gutxienez 289 hildako eragin ditu, Nepalgo Poliziak gaur emandako azken datuen arabera. Txinak beste hiru hildakoren berri eman du —haren menpe dago Tibeteko Eskualde Autonomoa—. Momentuz 1.300 lagun desagertuta daudela ere jakinarazi dute bi herrialdeek: 826 pertsona Nepalgo Bagmati probintzian —horietako 644 turistak dira, artean 517 atzerritar— eta beste 558 Tibeteko Gyirong konderrian —horietako 260 atzerritarrak—. Tokian tokiko agintarien arabera, litekeena da biktima eta desagertu gehiago egotea.
Txinak jakinarazi du dagoeneko 360 lagun baino gehiago ebakuatu dituela gune seguruagoetara; Nepalen, berriz, gutxienez 123 lagun erreskatatu dituzte, artean 29 atzerritar.
Nepalen desagertutako bidaiarien artean gutxienez 48 herrialdetakoak daude, turismoaz arduratzen den herrialdeko erakundearen arabera: besteak beste, 127 Nepalgoak bertakoak dira, 170 inguru Indiakoak, 65 Ameriketako Estatu Batuetakoak, 53 Ukrainakoak, 51 Malaysiakoak, 35 Australiakoak, 33 Erresuma Batukoak, 25 Kanadakoak, lau Frantziakoak eta beste lau Espainiakoak —BERRIAk ezin izan du baieztatu bidaiari horien artean ba ote den euskal herritarrik—; Txinako Atzerri Ministerioko bozeramaile Lin Jianek gaur adierazi duenez, beste ehun bat desagertu txinatarrak dira. Nepalen turista ugari izaten dira urte sasoi honetan. Mendizaleak izaten dira horietako asko, baina baita erromesak ere. Gainera, erromes horietako askok zeharkatzen dute Nepalen eta Tibeten arteko muga Gyirong eskualdetik. Hain justu, horixe da atzoko uholdeek eta luiziek kalte gehien eragin dituzten Tibeteko eskualdea.
Besteak beste, lur jausi batek Tibeten eta Nepalen arteko mugan dagoen herri bat suntsitu zuen atzo, eta uholdeek errepideak, zubiak, presak eta herriguneak hartu zituzten. Nepalgo Atzerri ministro Shishir Khanalen arabera, litekeena da lurrikara batek eragin izana bat-bateko uholde horiek. Khanalen esanetan, uste dute lurrikarak luizi handi bat eragin zuela, eta lur horrek ibai bat blokeatzearen ondorioz sortu zirela uholdeak. AEBetako USGS zerbitzu geologikoak 4,4 graduko seismo bat erregistratu zuen atzo goizean Tibeten, Nepalgo mugatik hurbil. Geroago, baina, USGSk zehaztu zuen luizi batek eragin zuela mugimendu hori, hau da, ez zela lurrikararik izan. Himalaian antzerako uholdeak gertatu izan dira, eta ez da erraza izaten zerk eragin dituen argitzea.Hala ere, hainbat ikerlarik BBC hedabideari adierazi diotenez, hipotesi nagusia da izotz bloke handi bat jaustearen eraginez sortu dela lur jausia.
Informazio gehiago, laster.
