Donald Trump AEBetako presidenteak Gazarako ondutako plana indarrean sartu bezain laster agerian geratu da zailtasunak daudela hura aplikatzeko. Bitartekari ibili diren herrialdeek —Egiptok, Qatarrek, AEBek eta Turkiak— herenegun sinatu zuten hogei puntuko dokumentua. Eta agertu dira jada zenbait kontraesan, mehatxu eta azken orduko aldaketa. Israelek akordioa urratzea leporatu dio Hamasi, ez baititu entregatu hildako bahitu guztien gorpuak, eta Tel Avivek, beraz, Gazarako adostutako laguntza humanitarioaren erdia sartzea baimenduko zuela iragarri zuen atzo. Bart, Hamasek beste lau bahituren gorpuak entregatu ditu, baina Israelgo armadak jakinarazi du horietako bat ez dutela ezein gatiburekin identifikatzea lortu; ondoren, laugarren gorpua gazatar batena dela baieztatu du.
Halere, oraindik hogei bat gatiburen gorpuak daude Gazan. Palestinako talde islamistak lau entregatu zituen herenegun, bizirik geratzen ziren hogei bahituak askatu zituen egun berean. Itunaren arabera, egun horretan bertan eman behar zizkion Israeli gainontzeko bahituen gorpuak ere, baina Hamasek argudiatu izan du birrindutako eraikinen hondakinen azpian daudela, eta horiek aurkitu nahian ari direla. Gainera, Gershon Baskin bahituen auzian bitartekari ibili den israeldarrak, CBS News AEBetako hedabidean egindako adierazpenetan, jakinarazi du gorpu horiek lurperatu zituzten buruzagi militarrak hilik daudela eta horrek are eta gehiago zailtzen duela akordioa betetzea.
Israelgo lehen ministro Benjamin Netanyahuren bulegoak ohar bat kaleratu du Hamasi gogoraraziz hitzarmenean adostutakoa betetzera behartuta dagoela, eta gorpu guztiak entregatu behar dituela. Horren harira, talde islamistaren bozeramaile Hazem Qasemmek adierazi du talde islamista adostutakoa betetzen ari dela, eta menia urratzea leporatu dio Israeli. Gaur bi palestinar hil ditu Israelgo armadak Gaza hirian, Al-Jazeera hedabideak jakinarazi duenez, eta atzo beste bederatzi hil zituen. Horrez gain, Al-Jazeerak gehitu du Israelgo militarrek hamabost pertsona atxilotu dituztela zerrendaren hegoaldean, Rafahn.
Bahituen gorpuen aferak Israel haserretu du, eta, horri erantzunez, Gazara laguntza humanitarioa sartzea ahalbidetzen duten pasabideak itxita izan zituen atzo. NBE Nazio Batuen Erakundeak eta nazioarteko GKE gobernuz kanpoko erakunde batzuen eskaerei jaramon egin die, ordea, eta gaur berriro ere ireki ditu pasabide horiek; hori bai, iturri ofizialak eta lekukoak aipatuz Al Jazeera hedabideak jakinarazi duenez, oraindik ez dira kamioi humanitarioak sartzen ari. Aldeek lehen faserako adostutakoaren arabera, egunean 600 kamioi humanitario dira zerrendan sartzekoak. Bestalde, Israelek esan du gazatarrek bihartik aurrera izango dutela zerrendatik irteteko aukera, hala nahi izanez gero, Rafahko pasabidea baliatuta.
Gazako akordioak izango ditu zailtasunak aurrerantzean ere; ez baitira gutxi Israelek eta Hamasek hurrengo pausoen inguruan dituzten desadostasunak. Horren adibide, Hamasek armak utziko dituela ziurtatu zuen atzo Trumpek, eta gainontzean «indarrez behartzeko» aukera ere mahai gainean jarri zuen. Honela mintzatu zitzaien kazetariei, Etxe Zurian: «Hitz egin dut Hamasekin, eta galdetu diet: 'Armak utziko dituzue, ezta?'. 'Bai, jauna, armak utziko ditugu', erantzun didate. Armagabetu egingo dira edo armagabetu egingo ditugu». Palestinako talde islamistak, aldiz, esana du ez duela armak uzteko asmorik.
Hamaseko kideak zazpi palestinar exekutatzen ageri diren bideo bat zabaldu da sare sozialetan, azken egunetan. BBC Erresuma Batuko hedabideak baieztatu duenez, exekuzio horiek Gaza hirian egin zituzten, eta milizianoek «kolaboratzaileak!» egiten dute oihu tiro egin aurretik. Azken egunetan gisa horretako irudi gehiago ere zabaldu dira. The Times of Israel-ek zerrendako iturriak aipatuz kaleratu duenez, asteburutik 33 pertsona hil ditu talde islamistak. Horren inguruan galdetuta, Trumpek ez zion garrantzi handirik eman: «Pare bat gaizkile bandatako kideak hil dituzte. Egian esan, ez dit asko axola. Ez da ezer pasatzen». Igandean AEBetako presidenteak adierazi zuenez, talde islamistari «denbora tarte bat» eman dio «Gazako arazoak konpontzeko».
GHFren papera «gerraostean»
Bitartekariak Trumpek proposatutako planaren xehetasun batzuk negoziatzen eta eman beharreko hurrengo urratsak aztertzen jarraitzen duten bitartean, hitzarmen horren baitan adostutako kontu gehiago publiko egiten hasi dira. Esaterako, The Times of Israel egunkariak itunaren eranskin bat argitaratu du gaur. Haren arabera, «gerraostean» GHF Gazako Fundazio Humanitarioa erakundea ez da arduratuko Gazan laguntza humanitarioa banatzeaz. Maiatz amaieratik AEBetako militar ohiek eta mertzenarioek osatzen duten talde horrek soilik eduki du Israelen baimena zerrendan laguntza banatzeko. Bada, orain berriz ere «NBEren agentziak, Ilargi Gorria, zerrendan jarduten duten herrialdeak eta beste erakunde batzuk» arduratuko dira laguntzaren kudeaketaz.
The Times of Israel-ek negoziazioetako iturriak aipatuz azaldu duenez, Tel Avivek ez zuen nahi GHFk esplizituki adieraztea aurrerantzean ez duela Gazan laguntza banatuko, horregatik gehitu zuten «beste erakunde batzuek» ere jarduteko aukera edukiko dutela. Baina Israelgo hedabidearen arabera, GHF laguntza banatzeko guneak uzten ari da iragan astetik. Laguntzaren banaketa kudeatzea soilik talde horren esku egon denetik, laguntza jasotzera joandako ia 1.400 palestinar baino gehiago hil ditu Israelgo armadak.
Ustelkeria kasuari buruzko gaurko auzi saioa lehenago amaitzeko eskatu du netanyahuk, «eztula» duela argudiatuta
Ustelkeria, iruzur egitea eta eroskeria egotzita, Israelgo lehen ministro Benjamin Netanyahuren aurkako hiru prozesu judizial daude abian. Horietako bati buruzko epaiketak iazko abenduan hasi zituzten; halere, bertan behera geratu izan dira hainbat auzi saio, Gazaren aurkako erasoaldiak eragindako «ezohiko egoera» aitzakia gisa erabilita. Gaur beste auzi saio bat izan du Netanyahuk, eta aurreikusitakoa baino lehenago amaitu da, Israelgo lehen ministroak hala eskatuta, hots; argudiatu du «eztula» zuela, eta medikuak «atseden hartzeko» gomendatu diola.
