Ali Khameneiren bigarren semea hautatu dute Irango buruzagi gorena izateko: Mojtaba Khamenei. Atzo iragarri zuen erabakia aiatola hautatzeaz arduratzen den batzorde erlijiosoak, eta herritarrei eskatu zien bat egiteko buruzagi berriarekin, «herrialdearen batasunari eusteko». Aiatola berriaren aukeraketaz galdetuta, halaxe erantzun dio Trumpek Times of Israel egunkariari: «Ikusiko dugu zer gertatzen den».
Ez da ezusteko erabakia izan. AEBetako presidente Donald Trumpek berak ohartarazia zuen ez zuela halakorik onartuko, eta Ali Khameneiren politikekin jarraituko duen inor hautatzeak beste gerra bat ekarriko duela «bost urtean». Izan ere, buruzagi estatubatuarraren arabera, berak luke azken hitza Irango aiatola hautatzeko garaian: «Denbora galtzen ari dira. Parte hartu behar dut izendapenean, Venezuelan Delcyrekin [Rodriguez] egin bezala».
Mojtaba Khameneik ez du sekula kargurik izan Irango Gobernuan, ez behintzat formalki. Baina botereguneetatik gertu egon da beti. 56 urteko buruzagiak teologia ikasi zuen, eta esku hartze handia izan du azken urteetan aiatolaren agintaldian.
Khameneiren izena 2009an nabarmendu zen lehen aldiz Iranen, presidentetzarako hauteskundeen osteko protestetan erreformistek egotzi ziotenean protestetan segurtasun indarren bortizkeria sustatu izana.
Mojtaba Khameneiren jarraitzaileentzat orain arteko ildo politikoari eutsiko dion buruzagitza da hura, Ruhollah Khomeinik hasi eta Ali Khameneik jarraitutako bideari eutsiko diona.
Irango iraultzaz geroztik lehen aldia da aiatolaren kargua aitarengandik semearengana igarotzen dela. Erabakiak eztabaida ere sor lezake, kontuan izanik xahren ostean baztertu egin zela sistema dinastikora itzultzea.
Bien bitartean, gerra ez da eten, nahiz eta Iranek asteburuan iragarri eten egingo zituela auzoko herrialdeen aurkako erasoak. Gatazka zabaltzen ari dela ikusita, Turkiak iragarri du sei F-16 hegazkin bidaliko dituela Ziprera, zehazki uhartearen iparraldera, Turkiaren menpeko eremura, eta «defentsa neurri gehiago» ere hartuko dituela, «beharrezkoa balitz».
