Nor baino nor ari dira. Gaur goizaldean, Donald Trump Ameriketako Estatu Batuetako presidenteak mehatxu egin dio Irani Truth sare sozialaren bidez: Ormuzko itsasartea «erabat» zabaltzen ez badu, hango zentral elektrikoei eraso egingo diela adierazi du, «handienetik hasita». Iranek beste mehatxu batekin erantzun dio, eta ziurtatu du, Ormuz erasotzen badute, AEBek eta Israelek eskualdean dituzten azpiegitura energetikoei, gatzgabetze plantei eta informazio zentroei erasotzeko prest dagoela.
Ali Mousavik, Iranek IMO Nazioarteko Itsas Erakundean duen ordezkariak, gaur esan du Ormuzko itsasartea zabalik dagoela nazioarteko nabigaziorako, «etsaiarekin lotutako itsasontzientzat» izan ezik. Mousavik adierazi du IMOrekin elkarlanean aritu eta prest daudela golkotik igarotzen diren itsasontzien segurtasuna bermatzera, beti ere Teheranekin koordinatzen badira. Gogorarazi du Israelek eta AEBek duela hiru aste Iranen kontra hasitako erasoaldia dela Ormuzko egoera eragin duena.
Mohammad Baxer Ghalibaf Irango Parlamentuko presidenteak, berriz, ohartarazi du ekialde hurbileko energia azpiegiturak «atzera bueltarik gabe» suntsituko dituztela AEBek eta Israelek Irango zentral elektrikoak erasotzen badituzte. Ghalibafen arabera, eraso horiek gertatuz gero, energia azpiegiturak helburu zilegiak bihurtuko lirateke, eta petrolioaren prezioa are gehiago igotzea eragingo lukete erasoek.
Atzo, Israelek eta AEBek Natanzko instalazio nuklearrari eraso egin ziotela salatu zuen Iranek, eta indartsu erantzun du: bost misil sorta bidali ditu Dimonako zentral nuklearrera, eta 40 lagun zauritu ditu. Toki hori gakoa da Israelen programa nuklearrarentzat. IAEA Energia Atomikoaren Nazioarteko Agentziak, behintzat, ziurtatu du ez duela ez ohiko erradiazio mailarik atzeman inguru horretan.
Israel hegoaldeko Arad hirian ere, bonbardaketek 59 zauritu eragin dituzte azken orduetan.
Benjamin Netanyahu Israelgo lehen ministroak, ordea, argi utzi du ez duela Iranen eta Libanoren aurkako gerra amaitzeko inongo asmorik. Araden aurkako erasoaren ostean zabaldu duen oharrean, aitortu du «gau zaila» izan dela «etorkizunaren aldeko kanpainan», baina zalantzarik egin gabe jarraituko dutela «aurkariei aurre egiten fronte guztietan».
Etxebizitzak eta zubiak
Libanon, Israel Katz Israelgo defentsa ministroak eta Netanyahuk «fronteko lehen lerroan» dauden etxebizitzak suntsitzeko agindu dute, «israeldarren komunitateentzat arriskuak murrizteko». Katzek berak eman du agindu horren berri, eta gehitu du armadak Litani ibaiaren gaineko zubi guztiak ere eraitsiko dituela, «ekintza terroristak» egiteko erabiltzen ari direlako horiek.
Armadak, bere aldetik, Libano hegoaldeko Tiro hiria gainontzeko eskualdeekin lotzen duen errepidea bonbardatuko duela jakinarazi du, bertara errefortzuak iritsi ez daitezen. Herritarrei iparraldera mugitzen segitzeko ere agindu die.
