Donald Trump AEB Ameriketako Estatu Batuetako presidenteak gerra irabazita dagoela iragarri badu ere, esan du erasoaldiak bere horretan jarraituko duela oraingoz. Eta hala esan du Tel Avivek ere. Gaur goizaldean Libano bonbardatu du berriz, eta gutxienez 24 pertsona hil ditu. Gainera, mehatxu egin du herrialdea okupatuko duela, eta iragarri Teheranen aurkako «eraso olde bat» hasiko duela.
Aurrez, Irango Guardia Iraultzaileak adierazi du Israelen aurkako erasoaldi bateratu bati ekin diola Hezbollah Libanoko talde xiitarekin. Azken orduetan 179 pertsona zauritu dituzte, Israelgo Osasun Ministerioaren arabera.
Hori dela eta, Israelgo Defentsa ministro Israel Katzek Libano «okupatzeko» mehatxua egin die bertako gobernuari eta Joseph Aaun presidenteari. «Libanoko presidenteari ohartarazi nion: gobernuak ez badaki lurraldea nola kontrolatu edota Hezbollahren erasoak nola gelditu, lurraldea hartuko dugu, eta haiek egiten ez dutena guk geuk egingo dugu», adierazi du Katzek, Defentsa Ministerioak ohar batean zabaldu duenez. Era berean, Israelgo armadak lehen aldiz agindu du Beiruteko hirigune bat ebakuatzeko. Avichay Adraee armadako bozeramaileak San Joseph unibertsitatea jarri du jomugan X sare sozialean, eta eremu hori husteko esan die herritarrei.
Libanok NBEn duen ordezkari Ahmed Arafak atzo adierazi zuen Libano «aukeratu ez duen gerra batean harrapatuta» dagoela, Israelen eta Hezbollahren artean. Gaineratu zuen herrialdea «oso egoera arriskutsuan» dela eta «katastrofe humanitario» baten atarian dagoela.
Ekialde Hurbileko beste hainbat gunetan ere izan dira erasoak gaur. Italiako Atzerri Ministerioak jakinarazi du misil batekin eraso egin diotela Italiaren base militar bati Arbilen, Iraken menpeko Kurdistanen. Eraso horretan ez dute inor zauritu. Eta Irakeko hedabideek zabaldu dutenez, Iranen aldeko milizia bateko 27 kide hil dituzte aire eraso batean Anbar probintzian, Siriako mugatik hurbil.
Hamahiru egun dira AEBek eta Israelek Ekialde Hurbileko gerra abiatu zutenetik, eta gutxienez 1.300 pertsona hil dituzte Iranen, eta 630 Libanon. Unicef Haurren Laguntzarako Nazio Batuen Funtsaren arabera, gutxienez 1.100 haur zauritu edo hil dituzte azken egunetan Ekialde Hurbilean egindako erasoetan. Hildako gehien Iranen zenbatu dituzte, gutxienez berrehun; Libanon, 91; Israelen, lau; eta Kuwaiten, bat.
3,2ZENBAT PERTSONA DESPLAZATU DITUEN IRANGO GERRAK, UNHCR-EN ARABERA.
Irango gerrak 3,2 milioi lagun desplazatu dituela salatu du Iheslarientzako NBEren Agentzia UNHCRk. Hamahiru egun igaro dira AEB Ameriketako Estatu Batuak eta Israel Iran bonbardatzen hasi zirenetik, eta, agentzia horren arabera, geroz eta desplazatu gehiago egotea espero dute. «Gehienek Teheran hiriburutik eta beste hirigune batzuetatik egin dute ihes, herrialdearen iparraldera eta landa eremuetara joateko».
Era berean, UNHCRk gogorarazi du Iranen 800.000 desplazatu zeudela gerra hasi zenean, Afganistanetik ihes egindakoak.
Gainera, Huthiek, Yemengo matxino xiitek, lehen oharra argitaratu dute gerrak eztanda egin zuenetik. Bertan, babesa adierazi diote Irani, eta esan dute «eskubidea» daukala Persiar golkoko herrialde arabiarrei misilekin eta droneekin eraso egiteko. «Irango Errepublika Islamikoak AEBen eta Israelen base eta interes kriminalei eraso egiteko eskubide legitimoa dauka», zehaztu du Yemengo Huthien Gobernuko Atzerri ministro Abdulwahed Aburasek, oharrean.
Hala ere, erasoei erasoen bidez erantzun ez ezik, diplomazia harremanak indartu nahian ari da Iran. Errusia eta Pakistango ordezkariekin bildu zen atzo iluntzean Abbas Araghtxi Irango Atzerri ministroa. Bileraren ostean, sareetan zabaldutako idatzi batean, ohartarazi zuen gerra amaituko bada «kalte ordainak» ordaindu beharko dituztela AEBek eta Israelek.
Irango estatu eredua ez dago kolokan
Gerra «irabazita» dago, Donald Trump AEBetako presidentearen ustez; Washingtongo zerbitzu sekretuek, ostera, ziurtatu dute Irango estatu eredua ez dagoela kolokan. Reuters berri agentziak AEBetako iturri ofizialak aipatuz gaur kaleratu duenez, azken ikerketetan ondorioztatu dute errepublika islamiarra ez dagoela «kolapsatzear», eta gaur-gaurkoz herrialdea «kontrolpean» dutela aiatolek. Ali Khamenei lider gorena otsailaren 28an hil bazuten ere ―erasoen lehen egunean―, sistema oraindik «batuta» dagoela iradoki dute ikertzaileek.
Halere, Trumpek berean jarraitzen du: gerran gailendu direla eta Irango armada «suntsituta» dagoela adierazi zuen atzo Alderdi Errepublikanoaren mitin batean, Kentuckyn (AEB).
