Gupidarik gabeko erasoaldiaren erdian, Israelek esaten du azken hilabetean egunero egin dituela «eten humanitarioak» Gaza hirian kostaldetik gertuen dagoen eremuan, besteak beste. Horiek bukatutzat eman ditu, ordea. Hori jakinarazi du gaur armadak, ohar batean. Argudiatu duenez, eremu hori «borroka esparru arriskutsu bat» da.
Israelek uztailaren 27an iragarri zituen «eten humanitarioak» deitutakoak, hiru tokitan: Gaza hiriko eremu batean, Muwasin, eta Deir al-Balahn. Erabaki hori aintzat hartuta, Israelek ez zien leku horiei eraso egingo 10:00etatik 20:00etara. Armadak orduan azaldu zuenez, zerrendan laguntza humanitario «gehiago» sartzeko hartu zuen neurri hori.
Gaza hirian kostaldetik gertuen dagoen eremuari dagokionez, baina, bertan behera utzi du neurria. Armadak nabarmendu du «ildo politikoa» kontuan hartuta hartu duela erabakia. Horren harira, Gaza hiria okupatzea onartu zuen Benjamin Netanyahu Israelgo lehen ministroak, abuztuaren 8an. Militarrek hiria inguratuta daukate, eta herenegun bertan operazio bat hasi zuten hiriaren iparraldeko muturra hartzeko.
Bien bitartean, eta nahiz eta Netanyahuk mahai gainean duen Qatarrek eta Egiptok proposatu eta Hamasek ontzat jotako menia planteamendu bat, Israelek segitzen du, 2023ko urriaren 7az geroztik ia-ia egunero egin bezala, zerrenda bonbardatzen. Hango Osasun Ministerioaren arabera, eraso horien ondorioz gutxienez 41 pertsona hil ditu Israelek gaur. 63.000 inguru dira azkeneko ia bi urteetan.
Israel Erresuma Batuarekin haserre
Netanyahuk jakinarazi du Hamasek 2023ko urriaren 7an bahitutako bi pertsonaren gorpuak berreskuratu dituztela. «Gatibuak etxera ekartzeko operazioak aurrera jarraitzen du», esan du lehen ministroak, komunikatu batean. Asteartean, milaka pertsona kalera atera ziren Israelen, eta eskatu zioten akordio bat egiteko bahituen inguruan. Bai Tel Avivek bai gatibuen senideek uste dute talde islamistak 48 bahitu dituela, eta horietatik hogei inguru daudela bizirik.
Bestalde, Israelgo Defentsa Ministerioa haserre dago Erresuma Batuko Gobernuarekin, ez duelako gonbidatu irailaren 9tik 12ra bitartean Londresen egingo den defentsa arloko azoka batera. «Diskriminazioa» salatu du, ohar batean. Downing Streeteko 10. zenbakiko eledun batek The Guardian egunkariari adierazi dionez, Tel Avivek Gazako erasoaldia areagotzeko hautua egin izana «okerra» da. «Horren ondorioz, baieztatu dezakegu Israelgo Gobernuko ordezkaririk ez dugula gonbidatuko».
