Ebro ibaitik Kantauri itsasoraino, Euskal Herri osoko hainbat eragilek babesa adierazi diote egunotan Palestinari. Elkartasun keinu horiek ugaritu eginen dira, gainera. Datozen asteetan, ehunka lagun aterako dira kalera, Israel Gazan egiten ari den genozidioa salatzera.
Iragan astelehenean Gazarako Mugimendu Globalak egin zuen bezala, Palestinarekin Elkartasuna taldeak ere sostengua eman dio Global Sumud flotillari. Mundu osoko dozenaka ontzik osatuko dute flotilla: aldi berean itsasoratuko dira datozen egunetan, eta zerrendara bidean jarriko dira, sarraskia salatzeko eta laguntza humanitarioa eramateko xedez. Bartzelonako portutik abiatuko dira lehenak, igandean, eta bidean batuko zaizkie irailaren 4an Tunisiatik eta Mediterraneoko beste portu batzuetatik irtengo direnak. Itsasoz blokeoa hautsi, eta laguntza eraman nahi dute zerrendara. Lau euskal herritarrek ere parte hartuko dute protesta ekintzan, mundu osoko beste hamaika ekintzailerekin batera.
Palestinarekin Elkartasuna taldeak «ekintza eredugarritzat» jo du egitasmoa, eta Mendebaldeko gobernuen «hitz hutsekin» alderatu: «Gobernu horiek, Palestinako estatuaren aitortza sinboliko baten bidez, genozidioarekin izandako konplizitatea zuritu nahi dute, hamarkada luzez Palestinaren okupazioa bultzatu eta hilabeteetan bonbardaketa eta erailketa sistematikoak justifikatu ondoren». Elkartearen esanetan, palestinarrak babesteko bide bakarra da «presionatzen» jarraitzea, «elkartasuna nazioartean antolatuz, konplizeei aurre eginez eta erresistentziari babes osoa emanez».
Palestinarekin Elkartasuna taldearena ez da flotillak Euskal Herrian izanen duen babes keinu bakarra: bihar Bilbotik autobus bat aterako da eta Donostiatik beste bat Bartzelonara, ontzidian joango direnei elkartasuna adieraztera. Gasteizen, berriz, manifestazioa egingo dute bihar, Artiumetik abiatuta, genozidioa salatu eta Israelen aurkako boikota eskatzeko.
Ikusi gehiago
Kazetarien protesta Iruñean
Genozidioa salatu dute Iruñean ere, gaur iluntzean. Kazetari eta argazkilari talde batek antolatu du protesta, salatzeko Israelek 200 berriemaile baino gehiago hil eta dozenaka espetxeratu dituela azken 18 hilabeteetan. Dozenaka lagun batu dira Gazteluko plazan egin duten elkarretaratzera.
«Zerrendan harrapatuta, Gazako berriemaileek ez dute non babestu, eta denetarik falta dute, baita elikagaiak eta ura ere», adierazi dute antolatzaileek manifestu batean. Sinadura bilketa ere abiatu dute, hedabideetako profesionalek ere bat egin dezaten agiri horrekin. Gazako egoera muturrekoa izanagatik, Palestinako beste lurraldeetan ere eskubideak egunero urratzen direla salatu dute kazetariek: «Zisjordanian, Israelgo armadak eta kolonoek kazetariei jazarri eta eraso egiten diete, baina errepresioak langa gainditu du urriaren 7aren osteko atxiloketa oldeen ostean. Kazetarien aurkako krimenen inpunitatea ohiko bihurtu da».
Horren guztiaren adibidetzat jo dituzte abuztuaren 10eko eta 25eko erasoak. Bi egun horietan, hamar kazetari hil zituzten, bonbaz. «Israelek nazioarteko hedabideei Gazarako sarbidea ukatzen dien garaiotan, tokiko kazetariak dira munduak duen leiho bakarra, han zer gertatzen ari den jakiteko, baina bizia galduz ordainarazten diete lan informatibo hori».
Horregatik guztiagatik, hiru eskaera egin dizkiete kazetariek Israeli eta nazioarteko gobernuei: bat, berehala eten daitezela kazetarien eta hedabideetako langileen aurkako erasoak; bi, «nazioarteko ikerketa independenteak» egin daitezela, hilketa guztiak argitzeko; eta hiru, eman daitezela «benetako bermeak», kazetariek, hala tokikoek nola nazioartekoek, aske egin dezaten beren lana.
Eltze jotzeak herrietan
Gernika-Palestina taldeak ere protestara deitu du datozen egunetarako. «Palestinako herriaren aurkako genozidioa gogortu izana» salatuko dute irailaren 5ean, Euskal Herriko udalerri guztietan. «Gazako azpiegitura guztiak sistematikoki suntsitu ondoren, Israelek jarraitzen du palestinar herritarrak sarraskitzen eta, gainera, gosez eta egarriz hiltzen, erortzear dauden ospitaleei erasotzen eta genozidio hau munduari transmititzen dioten komunikabideetako ehunka langile hiltzen», adierazi du elkarteak, ohar batean.
Egoera konpontzen hasteko bide bakarra Israel «bakartzea» dela uste dute Gernika-Palestina elkartekoek, Benjamin Netanyahu lehen ministroa negoziatzera behartzeko: «Europako Batasunak eta hura osatzen duten estatuek tresnak dituzte Israelgo Gobernuaren jarreran nabarmen eragiteko. Eurak dira Israelen lehentasunezko merkataritza bazkide eta arma hornitzaile nagusietakoak. Tokiko erakundeak ere dinamika berean kokatu behar dira, eta gaur egun dituzten harreman instituzional, komertzial, kirolaren esparrukoak edo beste edozein eratakoak eten».
«Ekintzarako garaia» dela sinetsita, Gernika-Palestinak protestak antolatu ditu Euskal Herriko udalerri guztietan: eltze jotzeak eginen dituzte hilaren 5ean, 19:00etan, udalerri guztietako udaletxeen parean.
Irailaren 2an ere protesta ekintza bat iragarria dago, Espainiako Vueltako etapa Izaban (Nafarroa) amaituko dela baliatuta. Izan ere, kirol proba horretan Israelgo talde batek parte hartzen du —Israel-Premier Tech—, eta hura kanpoan uzteko eta hari boikot egiteko eskatuko dute. Tuteratik Hendaiara arteko martxa bat ere antolatu dute irailaren 10etik 20ra bitarte.
