Espainiako Gobernuko Ministroen Kontseiluak gaur jakinarazi du partzialki indultatuko duela Kataluniako Parlamentuko presidente ohi Laura Borras (JxC) —Kataluniako Parlamentuko Mahaiak diputatu akta erretiratu zion duela lau urte, gaurko egunez—. Kataluniako Auzitegi Nagusiak lau urte eta erdiko kartzela zigorra ezarri zion 2023ko martxoan JxC alderdiko presidente izandakoari (2022-2024), prebarikazioa eta dokumentuak faltsutzea leporatuta, eta bi urteko zigor batengatik aldatu diote orain. Hamahiru urteko inhabilitazioa eta 36.000 euroko isuna ere ezarri zion Kataluniako Auzitegi Nagusiak, baina zigor horiek bere horretan mantenduko direla argitu du gaur Ministroen Kontseiluak. Hortaz, kartzelan sartuko ez den arren, ezingo du bere ibilbide politikoarekin aurrera jarraitu datozen hamar urte pasatxoetan.
Delitua Kataluniako Letren Institutuko zuzendari zen garaian egin zuen —2013tik 2018ra—. Epaiaren arabera, hemezortzi kontratu publiko modu irregularrean esleitu zizkion ezagun zuen Isaias Herrero informatikariari.
Borrasek helegitea jarri zuen, eta azaldu Auzitegi Nagusiak berak epaian adierazi zuela espetxe zigorra «neurriz kanpokoa eta gehiegizkoa» zela. Izan ere, Auzitegi Nagusiak azaldu zuenez, ez Borrasek ezta beste bi zigortuek ere ez zuten «irabazi pertsonalak lortzeko asmoz» jokatu. Hortaz, Auzitegi Nagusiak berak planteatutako baldintzen barruan eman diote indultua. Hala ere, orduko hartan Gorenak ez zuen iritzirik eman horren inguruan.
Epaiaren berri jakin berritan, agerraldi publiko bat egin zuen Borrasek, bere alde lerratu ziren hainbat manifestarirekin batera. «Ez dut epaiketa justu bat izan, eta ezin nuen sententzia justu bat espero», esan zuen Kataluniako Parlamentuko presidente ohiak. Errugabea dela adierazi zuen, eta «mugimendu independentista suntsitzeko saiakera bat» zela gaineratu.
Gaur, erabakiaren berri izan aurretik, Borrasek txio batean gogoratu du gaurko egunez kendu zutela Kataluniako presidente kargutik, duela lau urte. Azaldu du erabaki «arbitrarioa eta alderdikoia» izan zela, eta orain atzera begiratzeak zentzua duela soilik aurrerapausoak emateko balio badu. «Jazarpen judiziala Estatuaren errepresio politikoaren tresna nagusietako bat izan da; ezin dugu onartu horrek gu barrutik ahultzea. Horregatik, eskuzabaltasunez eta herri zentzua erabiliaz lan egiten jarraitu behar da, helburu kolektiboaren eta mugimendu independentistaren zerbitzura», gaineratu du txio horretan.
Ara fa quatre anys de la meva suspensió com a presidenta del @parlamentcat, arran de l’aplicació arbitrària i partidista de l’article 25.4.
— Laura Borràs 🎗 (@LauraBorras) July 28, 2026
Aquell episodi va evidenciar fins a quin punt el lawfare podia acabar condicionant també les nostres pròpies decisions. I aquesta és una…
