Dozenaka mila manifestarik desafio egin diote Viktor Orban Hungariako lehen ministroari; haren gobernuak debekatua bazuen ere, Harrotasunaren Martxa egin dute gaur Budapesten. Askatasuna ezin da debekatu lelopean egin dute LGTBI Komunitatearen Nazioarteko Eguneko manifestazioa. Hungariako Gobernuak adingabeen «garapen egokia bermatzeko» ezarritako lege bat dela medio, Poliziak ez du baimenik eman martxa egiteko. Gergely Karacsony Budapesteko alkate ekologistak, ordea, udal ekitaldi izendatu zuen martxa, eta, horrela, antolatzaileek ez dute gobernuaren onespenik behar izan.
LGTBI komunitatearen aldeko aldarrikapenek eta Hungariako Gobernuaren aurkakoek hartu dituzte Budapesteko kaleak arratsaldeko hiruetan hasita. Budapesteko Harrotasunaren Martxak 30 urte bete ditu aurten, eta, antolatzaileen arabera, 100.000 pertsona baino gehiago elkartu dira; tartean, dozenaka europarlamentari. Ultraeskuinekoak kenduta, talde parlamentario guztietako diputatuek parte hartu dute Budapesteko mobilizazioan; hori bai, Europako Parlamentuan lehen alderditik, hau da, Europako Alderdi Popularretik bi ordezkari soilik joan dira. Han izan da Ikoitz Arrese EH Bilduko legebiltzarkidea ere, Eusko Legebiltzarraren ordezkari moduan.
Martxa hasi eta gutxira, Polizia manifestariei bidea ixten saiatu da, baina, azkenean, aurrera jarraitu du martxak. Bestalde, eskuin muturreko hainbat taldek elkarretaratzeak antolatu dituzte Harrotasunaren Martxaren aurka. Eta horiek bai, Poliziaren baimena jaso dute.
