Akordioa kolokan zegoen, baina berretsi egin dute SDF Siriako Indar Demokratikoak taldeko kideek eta Siriako Gobernuak: hala, gehiengo kurdua duten milizia horiek estatuaren egituratan integratuko dituzte. Komunikatu baten bidez jakinarazi dute hori SDFkoek: «Menia akordio bat sinatu dugu, bi aldeetako indar militarrak eta administratiboak modu mailakatuan integratzea aurreikusten duen akordio integral baten barruan». Hori bera baieztatu du Siriako telebistak, iturri ofizialak aipatuta.
Akordioaren hainbat xehetasun ere aurkeztu dituzte. Lehenik, adierazi dute Siriako Estatuko indar militarrak erretiratu egingo direla gatazka eremuetatik; bigarrenik, Siriako Barne Ministerioaren «menpeko» segurtasun indar batzuk Hasaka eta Qamixli hirietara sartuko direla —gehiengo kurdua dute ipar-ekialdeko hiri horiek—, eta eskualdeko segurtasun indarrak integratzeko prozesu bat hasiko dutela; eta hirugarrenik, Siriako armadan aparteko dibisio militar bat eratuko dutela SDFko indarrentzat: lau brigada izango ditu dibisio horrek, eta horietako bat Kobanen arituko da.
Horrez gain, adostu dute kurduen administrazio autonomoak kudeatzen dituen instituzioak Siriako Gobernuaren instituzioetan integratzea. Akordioan gaineratu dutenez, kurduen eskubideak bermatuko dira, baita hezkuntza eskubideak ere, eta desplazatuak beren eremuetara itzuli ahal izango dira. Zera ondorioztatzen da testuan: «Akordioaren helburua da Siriako lurraldea bateratzea eta kurduen eskualdea erabat integratzea, eta, hala, bi aldeen arteko lankidetza indartzea eta herrialdea berreraikitzeko ahaleginak bateratzea».
[Informazioa osatzen ari gara]
