Donald Trumpek Venezuelako jarduneko presidente Delcy Rodriguezekin hitz egin zuen atzo telefonoz. AEBetako presidentearen esanetan, «bikaina» izan zen elkarrizketa, eta esan zuen Rodriguez «pertsona ederra» iruditu zitzaiola. Rodriguezen beraren arabera, «luzea, eraginkorra eta atsegina» izan zen deia. Baretu da tentsioa. Trumpen hitzetan, petrolioa eta mineralak izan zituzten hizpide, besteak beste. Eta dei horren biharamunean, Venezuelako oposizioko buruarekin bilduko da Trump, Maria Corina Machadorekin: gaur elkartuko dira, Etxe Zurian, Euskal Herriko 18:30ean. AEBetako presidentearen bulegoak ohar baten bidez jakinarazi duenez, elkarrekin bazkalduko dute. Ateak itxita izango da bilera.
Machado eskuin muturreko politikariak agintea hartu nahi du Venezuelan, baina Trumpek, orain arte esan duenagatik behintzat, ez du halakorik nahi. Urtarrilaren 3an, AEBek Venezuelari eraso egin eta Nicolas Maduro presidentea bahitu zutenean, Etxe Zuriko maizterrak argi utzi zuen prentsaren aurrean: «Uste dut oso zaila izango litzatekeela harentzat [Machadorentzat] liderra izatea. Ez du herrialdearen babesik, ezta errespeturik ere».
Kolpea hartu zuen Machadok. Hainbat hedabidek AEBetako administrazioaren iturriak aipatuz kaleratu zutenez, batez ere arrazoi batengatik ez du egin Trumpek Machadoren alde: CIA Inteligentzia Agentzia Zentralak egindako txosten bat jaso zuen presidenteak, eta, hartan, ez zuten gomendatzen Machado jartzea agintean Venezuelan, horren ondorioz altxamendu militar bat izan zitekeelakoan.
AEB-ETAKO SENATUAK BLOKEATU EGIN DU TRUMPI VENEZUELAN EKINTZA MILITAR GEHIAGO EGITEA ERAGOZTEN DION LEGE BAT
AEBetako Senatuak blokeatu egin du Donald Trump presidenteak Venezuelan ekintza militar gehiago egitea eragoztea helburu zuen lege bat. 50 senatarik bozkatu dute alde gaur goizaldean, beste horrenbestek kontra, eta, orduan, arautegia eskuan, JD Vance herrialdeko presidenteordearen aurkako botoak berdinketa hautsi du. Osoko bilkuran errepublikanoek adierazi dutenez, «garrantzi gutxi» zuen lege proposamenak, iritzita jada «bukatu» direla AEBek Venezuelaren aurka egindako ekintza militarrak. Joan den astean, testua osoko bilkurara eramatea erabaki zutenean, Alderdi Errepublikanoko bi senatarik alde bozkatu zuten; gaur goizaldean, aldiz, kontra egin dute, eta hori erabakigarria izan da.
Baina Trumpen jarrera aldakorra dela jakinda, Machadok ahalegina egin du hura limurtzeko politikagintzarekin eta herrialde baten interesekin zerikusirik ez duten bide bat ibiliz: Bakearen Nobel saria irabazi zuen abenduan, eta Trumpi proposatu dio hura partekatzea. Izan ere, Trumpek pentsatzen zuen berak irabaziko zuela, eta Machado horren jakitun da. Saria ematen duen erakundeak —Nobelaren Norvegiako Batzordeak— nabarmendu du, ordea, ezin dela halakorik egin.
Bien bitartean, Rodriguez jarduneko presidenteak atzo Trumpekin mintzatu ondoren azpimarratu zuen Venezuela «aldi politiko berri batean» dagoela. Miraflores jauregian kazetariei adierazi zienez, aldeek «elkar ulertzea» sustatu behar da, «desberdintasun politikoa» gorabehera. «Ez dugu onartuko ez gorroto mezurik, ez indarkeria ekintzarik». Jakinarazi zuen, bide batez, azkeneko bi asteetan laurehun preso pasa askatu dituztela.
