Ukrainako auzian alde batera eta bestera egiten jarraitzen du Donald Trump AEBetako presidenteak. Oraingoan, proposatu du gerra frontea «izozteko», hau da, alde bakoitza gaur-gaurkoz kontrolpean dituen lurraldeetan geratzeko, eta ondoren muga horiek negoziatzen hasteko. 2022ko otsailean inbasioa hasi zuenetik, Luhansk, Donetsk, Kherson eta Zaporizhiako eskualdeak okupatu ditu Errusiak —aurrez Krimea ere bai—. Eta, Trumpek atzo gauean kazetarien aurrean proposatutakoaren arabera, Moskuren esku geratuko lirateke eskualde horiek. «Aurrerago negoziatu ahal izango dute», gehitu zuen.
Irailera arte Trumpek ezinezkotzat joa zuen gatazka amaitzea lurralde trukerik egin ezean. Irailean New Yorken (AEB) Volodimir Zelenski Ukrainako presidentearekin hitz egiten ostean, baina, ziurtatu zuen Ukrainak aukera izan zezakeela galdutako lurraldeak berreskuratzeko.
Hain zuzen, ostiralean batzartu ziren beste behin Trump eta Zelenski, Etxe Zurian. Financial Times Erresuma Batuko egunkariak gaur kaleratu duenez, Kremlinen eskakizunei men egiteko eta Donbass —Luhansk eta Donetsk eskualdeek osatzen dute— Errusiaren esku uzteko exijitu zion AEBetako presidenteak Zelenskiri. Egunkariak iturri ofizialak aipatuz gehitu duenez, bi agintariak oihuka aritu ziren, eta Trumpek Zelenskiri ohartarazi zion Errusiak Ukraina «suntsituko» duela haren eskaerak betetzen ez baditu.
