AEBetako presidenteak ez du aginpiderik Venezuelako aire eremuaren inguruan. Aginpiderik ez, baina boterea bai. Eta Donald Trumpek Truth bere sare sozialetan zabaldutako mezu soil bat aski izan da albistea nazioarteko hedabide gehienetako titularretan agertzeko. «Aire konpainia, pilotu, droga trafikatzaile, eta gizakien salerosle guztiei» ohartarazi die Venezuelako eta haren inguruko aire eremua «erabat itxita» dagoela. AEBetako armadak hainbat eraso egin ditu azken hilabeteetan Karibeko uretan, Etxe Zuriaren arabera, narkotrafikoari aurre egiteko. Operazio horiek eta azken asteetako adierazpenek are gehiago tenkatu dute Caracasen eta Washingtonen arteko harremana.
Erlazionatuta
Trumpek berak asteon iragarri du areagotu egingo dituztela operazio horiek, eta, itsasoan egindako erasoez gainera, Venezuelako lurretan ere operazioak egiteko aukera jarri zuen mahai gainean. Horren ostean iritsi da aire eremuaren inguruko ohartarazpena. Aginpiderik ez badute ere, zenbait estatuk eta aire konpainiak AEBen ohartarazpenei men egin izan diete. Horren erakusgarri, azken egunetan nazioarteko hainbat aire konpainiak —gutxienez, seik—bertan behera utzi dituzte Venezuelara egin beharreko bidaia guztiak. Izan ere, AEBetako Gobernuak adierazi zuen Venezuelan eta haren inguruan egoera «arriskutsua» zela, eta «kontu handiz» ibiltzeko ohartarazi.
Gaurko adierazpena izan da bi herrialdeen arteko harremana are gehiago gaiztotu duten neurrietan azkena. Duela bi aste pasa, AEBetako armadak zabaldu egin zituen Karibe Itsasoan egiten ari diren operazioak, eta martxan jarri zuen Hegoaldeko lantza deituriko operazioa. Operazio horren baitan, USS Gerald R. Ford hegazkinontzia Venezuelaren kontrolpeko uren mugara eraman dute —munduko hegazkinontzirik handiena da—. Irailetik gutxienez 80 pertsona hil ditu AEBetako armadak «narkoterrorismoaren» aurkako operazio horietan.
Gainera, aste honen hasieran, AEBetako Estatu Departamentuak «erakunde terrorista» izendatu du Cartel de los Soles, Nicolas Maduro Venezuelako presidentearekin lotzen duen erakunde bat. Trumpek Madurorekin lotzen badu ere, ez dago informazio argirik erakunde horren inguruan. Caracasek Washingtonen «asmakizun bat» dela esaten du, eta izendapen horrekin zera nahi duela: Maduro presidente kargutik kentzea eta Venezuelaren aurkako erasoak «justifikatzea».
Madurorekin telefonoz
Trumpek gaur goizaldean idatzi du Venezuelako aire eremuaren inguruko mezua, noiz eta The New York Times egunkariak Trumpen eta Maduroren arteko telefono dei baten inguruko berria zabaldu eta gutxira. Kazetaren arabera, bi presidenteak iragan astean hitz egin zuten, bien arteko bilkura bat hitzartzeko asmoz, baina ez zuten ezer adostu.
