Albistea entzun

Eusko Legebiltzarrerako hauteskundeak. Ondorena

PSE-EE prest dago EAJrekin gobernu ituna berritzeko

Eneko Anduezaren iritziz, jeltzaleei dagokie «ekimena» hartzea. «Negoziazioa nola planteatzen duten ikusi nahi dugu». PSOE, oro har, Eusko Jaurlaritzan segitzearen alde
Idoia Mendia PSE-EEren lehendakarigaia, hauteskunde gauean egindako agerraldian.
Idoia Mendia PSE-EEren lehendakarigaia, hauteskunde gauean egindako agerraldian. JAVIER ZORRILLA / EFE Tamaina handiagoan ikusi

Igor Susaeta -

2020ko uztailak 14

EAJk adierazi du jada, Itxaso Atutxa BBB Bizkai Buru Batzarreko presidentearen hitzez, Eusko Legebiltzarraren hurrengo legegintzaldian PSE-EErekin gobernu akordioa berritzeko asmoa dutela. «Kanpainan ez dugu ezkutatu. Hitz egiteko asmo irmoa erakutsi duen alderdi bakarra da», nabarmendu zuen Atutxak atzo, Radio Euskadin. Irrati berean elkarrizketatu zuten Eneko Andueza PSE-EEren legebiltzarkidea, Gipuzkoako zerrendaburua, eta esan zuen, Idoia Mendia lehendakarigaiak hauteskunde gauean azpimarratutakoaren bidetik, EAJri dagokiola «ekimena» hartzea, hauteskundeak irabazi dituelako, eta PSE-EE prest dagoela «akordiorako, ezberdinen arteko elkarrizketarako». PSE-EEren zuzendaritza atzo arratsaldean bildu zen.

2016ko bozekin alderatuta, PSE-EEk eserleku bat irabazi du ganberan, eta, bederatzi izan beharrean, hamar izango ditu. Era berean, parlamentuko hirugarren indarra bihurtu da. Dena dela, kontuan hartuta Espainiako Gobernuan agintean dagoela, 2016koetan hondoa jo zuela, ondorengo hauteskundeetan gorantz egin duela, eta inkestek, oro har, bi edo hiru eserleku gehiago ematen zizkiotela, erdi beteta eta erdi hutsik ikusten dute botila. Mendiak herenegun gauean esan zuen emaitzak «oso onak» direla, baina aitortu zuen «indar handiagoa» edukitzea gustatuko litzaiekeela. EAEko legebiltzarrerako egindako hauteskundeetan inoizko abstentziorik handiena —%47koa— egon izanari egotzi zion boto gehiago lortu ez izana.

PSE-EEren Gipuzkoako idazkari nagusiak hauteskundeen garaileen teilatuan utzi nahi izan du pilota. «Ikusi nahi dugu zer jarrera eta akordioak lortzeko zer borondate duten, eta negoziazioa zer modutan planteatzen duten». Bi indarrek bat egingo balute, gehiengo osoa lortuko lukete Eusko Legebiltzarrean—41 eserleku—. «Hauxe da egoera, eta helburuak asko aldatu dira», nabarmendu zuen, halere, Anduezak.

Haren ustez, «zalantzarik gabe» dira «onak» emaitzak, eserleku bat gehiago edukiko dutelako. «Eserleku bat gehiago edukiko dugu, boto portzentajean gora egin dugu [nahiz eta 2016koetan baino boto gutxiago lortu], eta eremu nazionaleko alderdien artean PSE-EE da irabazle argia, PPk eta Podemosek hartu duten danbatekoa ikusita». Atzoko elkarrizketan galdetu zioten ea abagunea aintzat hartuta emaitza hobeak espero zituzten, eta erantzun zuen «zuhurra» dela beti: «Zirkunstantzia hauetan, halako gauzak gertatu egiten dira».

Elorza, «hausnartzeaz»

PSE-EEk hauteskundeetan lortutako emaitzek ez dituzte «espektatibak bete», Odon Elorza PSOEren zuzendaritzako Gardentasun eta Demokrazia Parte Hartzailearen idazkariaren esanetan. Bere Twitter kontuan «hausnarketarako» deia egin du, eta zenbait galdera planteatu ditu. «PSE-EE konformatuko da beste lau urtez EAJrekin koalizioa mantentzearekin gure proiektua ito gabe? Edo estrategia aldaketa batez hausnartu behar dugu, eta euskal gizartearen zerbitzurako egon, oposizio arduratsu eta eraikitzaile bat eginez?». Efe berri agentziak PSOEren iturriak aipatuz kaleratutakoaren arabera, batzorde federala, oro har, ituna errepikatzearen aldekoa da.

Elorza Gipuzkoako kongresukidea da Espainian; haren hitzei heldu zien Anduezak, eta azaldu zuen PSE-EE ez dela gobernuetan sartzen «pentsatuz beretzat, alderdi gisa, onuragarria» izango dela, baizik eta «herritarren onuran pentsatuz». Haren esanetan, PSE-EEren helburua ez da aldatuko: «Hori da jendearen bizi baldintzak hobetzen ahalegintzea».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Juan Alberto Belloch, artxiboko irudi batean. ©Javier Cebollada / EFE

Juan Alberto Belloch: «Galindo, borrokalari antiterrorista bezala, onena zen»

Iosu Alberdi

Justizia eta Barne ministro ohiak adierazi du bera izan zela Galindori jeneral kargua ematea ahalbidetu zuena, nahiz eta jakin atxilotuak torturatzen zituela.

Eba Blanco (erdian), azaroko biltzarrean, idazkari nagusi izendatua izan ondoren. ©JAVIER ZORRILLA / EFE

EAren primarioak errepikatzeko aginduaren aurkako helegiteak aztertuko dituzte

Xabier Martin

Espainiako Auzitegi Gorenak EAren eskaera tramitera onartu du, eta alderdiaren primarioak errepikatzea agindu zuen probintzia auzitegiaren epaia balekoa den ala ez erabakiko du.

Donostiako Renferen geltokia. ©GORKA RUBIO / FOKU

Beste geltoki bat aldiriko trenen transferentziaren lokarria askatzeko

Xabier Martin

Laster egingo dute Gasteizek eta Madrilek aldiriko trenen eskuduntza gerturatuko lukeen bilera

Senpereko herriko etxeko oposizioak ere dimititu egin du

Senpereko herriko etxeko oposizioak ere dimititu egin du

Arantxa Iraola

Urrian hautetsi hainbatek utzi zuten kargua, auzapezaren kudeaketa ereduarekin kritiko

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...