Itunpekoetako gatazka, datorren ikasturtera luzatzeko zorian

Proposamenik ezean, sindikatuek iragarri dute mobilizazioekin segituko dutela. Patronalak esana du «ezin» duela neurri berririk eskaini
Joan den asteleheneko manifestazioa, Bilboko Kale Nagusian.
Joan den asteleheneko manifestazioa, Bilboko Kale Nagusian. MONIKA DEL VALLE / FOKU Tamaina handiagoan ikusi

Ibai Maruri Bilbao -

2019ko apirilak 5

Amaitu da lau eguneko greba deialdia Kristau Eskolako eta IZEAko ikastetxeetan. Ikasturte hasieratik 22 egunez egin dute greba. Eta gatazka inoiz baino gaiztotuago dago. Patronalak esan du ez duela proposamen berririk egingo, joan den astekoa dela egin dezakeen «azkena». Asteartean ez zen agertu sindikatuek Lan Harremanetarako Kontseiluaren egoitzan deitutako bilerara. Aurretik akordiorik lortu ezean, maiatzerako dute hurrengo deialdia. Baina sindikatuak dagoeneko hurrengo ikasturtera begira ipini dira. Duela aste bi ordezkarietako batzuek «epe ertainera» akordioa «posible» ikusten bazuten, orain ez dute baztertzen ikasturte berria grebekin hastea. ELA sindikatuko Hezkuntza arloko arduradun Miren Zubizarretak esan du patronalek proposamen berririk egiten ez badute, mobilizazioekin jarraituko dutela: «Greba izango da geratuko zaigun aukera bakarra».

Martxoan Manu Lezertua EAEko arartekoaren babesa ere bazuten sindikatuek. Langileen aldarrikapenak bidezko jo zituen, eta patronal eta sindikatuen artean bitartekari lanak egiteko prest agertu zen. Herenegun, ordea, gatazka «pribatua» dela esan zuen, eta, horregatik, patronalek eta sindikatuek konpondu behar dutela, ez arartekoaren ez Eusko Jaurlaritzaren bitartekaritzarik gabe. Zubizarretak erantzun dio Araba, Bizkai eta Gipuzkoako ikastetxeen ia erdia dagoela gatazkan. 120.000 bat neska-mutilek ikasten dute zentro horietan. Jaurlaritzak itunpeko sarea «azpikontrata merketzat» duela salatu du: «Hezkuntzan egindako murrizketak itunpekoetan ere aplikatu ditu. Orain ezin du bere erantzukizuna ukatu». Cristina Uriarte sailburuak greba «itunpeko sarearen aurkakotzat» jo du, eta sindikatuak haserrearazi.

Langileen artean nabaritu da nekea. Sindikatuek eurek emandako datuak dira: urtarrileko deialdian langileen %65ek egin zuten bat grebarekin; apirilekoan, berriz, %55ek. Kristau Eskolak urtarrilean irakasleen herenak greba egin zuela esan zuen; atzo, %16k. Dena den, Zubizarretak uste du parte hartzea «handia» izan dela orain ere. Salatu du langileek nekea ez ezik zentroen «presioa» ere sentitu dutela.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Bi pertsona maskarak soinean daramatzatela, autobusean. ©JUAN CARLOS RUIZ / FOKU

Lau gako asintomatikotasunaz

Arantxa Iraola

Kutsatu guztiek ez dituzte izaten sintomak. Adituek diote COVID-19an positibo emandakoen erdiek-edo, birusa izan arren, ez dutela batere sintomarik. Horrek zaildu egiten du izurriaren kontrola.

Ikasgela huts bat, artxiboko irudi batean. ©Jon Urbe, FOKU

Beste hamabost ikasgela itxi ditu Jaurlaritzak

Uxue Rey Gorraiz

Eusko Jaurlaritzak esan du 280 ikasgela daudela bakartuta Arabako, Bizkaiko eta Gipuzkoako hezkuntza sisteman, pandemiarengatik.

Sindikatuek jantoki zerbitzua bermatzeko egindako elkarretaratze bat, artxiboko irudian ©luis jauregialtzo / foku

Hezkuntza Sailak 630 langile kontratatu ditu jantokietarako

Irati Urdalleta Lete

EHIGEren iritziz, ez da nahikoa Arabako, Bizkaiako eta Gipuzkoako eskola publikoetako jantokietarako 630 langile kontratatzea. Hezkuntza Sailak ez du jardunaldi jarraitua ezarriko Haur Hezkuntzako eta lehen Hezkuntzako ikasleentzat.

PCR probak, Urdulizko ospitalean. ©Aritz Loiola, FOKU

Positibo gutxiago atzeman dira

Uxue Rey Gorraiz

Beste 679 detektatu dituzte Hego Euskal Herrian, eta apaldu egin da ospitaleratuen kopurua: 42 lagun sartu dituzte erietxean azken egunean. 72 gaixo daude ZIUetan. Gizonezko bat hil da Nafarroan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna