Albistea entzun

Espainiako Gorteetarako hauteskundeak. Hego Euskal Herria

«Faxistarik» ez dutela nahi aldarrikatu dute, Voxen mitinetan

Ertzaintzak Bilbon lau lagun atxilotu ditu, Abascalek Poliziaren indarra eskatu ondoren. Aurretik Donostian ere tentsioa izan da
Hainbat antifaxista, atzo, Donostian, Kursaal atarian Voxen ekitaldia zela eta, Ertzaintza aurrean zutela.
Hainbat antifaxista, atzo, Donostian, Kursaal atarian Voxen ekitaldia zela eta, Ertzaintza aurrean zutela. A. CANELLADA/ FOKU Tamaina handiagoan ikusi

Enekoitz Esnaola -

2019ko apirilak 14

Ehunka lagunek aurre egin zieten atzo «faxistei» Donostian eta Bilbon, Vox Espainiako eskuin muturreko alderdiaren hauteskunde kanpainako ekitaldietan, eta Euskal Herrian ez dituztela nahi aldarrikatu. Bi ekitaldietan tentsioa izan zen, eta Ertzaintzak Bilbon gutxienez lau atxiloketa egin zituen. Aurretik Donostian ere liskar batzuk izan ondoren, Santiago Abascal Voxen presidentegaiak Twitterreko bere kontuan salatu zuen Eusko Jaurlaritzaren onespenez gertatu zela haien aurkako «erasoa», eta eskatu zuen arratsaldean Bilbon antzeko egoera gertatuz gero Poliziak indarra erabiltzeko «proetarren» aurka.

Donostian eguerdian manifestazioa egin zuten, Antikapitalistak, Asade, Askapena, Askekintza, CNT, Donostiako Bilgune Feminista eta Ongi Etorri Errefuxiatuak eragileek deituta, Faxistak Euskal Herritik kanpora lelopean, eta, gero, Kursaal aurrean bildu ziren, han baitzuen ekitaldia Voxek. Ertzaintzak, ordea, ez zien sobera hurbiltzen utzi, eta, ekitaldia bukatu ostean Voxeko jarraitzaileak kanpora ateratzen hasi zirenean, Ertzaintza oldartu egin zitzaien manifestariei. Voxeko zale eta antifaxista batzuen artean enfrentamenduren bat ere egon zen. Arratsaldean, Bilbon egin zuen mitina alderdiak, Euskaldunan, eta han ere protestara deitu zuten hainbat eragilek. Tentsio uneak bizi izan ziren; pilotakadak bota zituen Ertzaintzak, lagun batzuk zauritu zituen, eta atxiloketak izan ziren; liskar handiak gertatu ziren Bilboko kaleetan.

Donostian 350en bat lagun bildu zituen Voxek, 500entzako areto batean. Nagusiki, Espainiako banderak izan zituzten. Ekitaldia bukatu eta ataria libre geratu zenean, Sortuko hainbat kide azaldu zen lekua «desinfektatzera». Gotzon Elizburuk azaldu zuen «eskuin muturra, faxismoa eta autoritarismoa mehatxu» direla Euskal Herriarentzat. Kursaal ataria garbitzera joan ziren Sortukoak, Espainiako eskuinak «gezurrez, irainez eta zabarkeriaz zikin nahi dituelako bazterrak».

EAJren aurka Abascal

Bi ekitaldietan izan zen Abascal. Donostian esan zuenez, Euskal Herrian oraindik ere «beldurra» dago, «baina Espainia biziak ez dio beldurrik ez ezeri, ez inori».

EAJren aurka ere hitz egin zuen Abascalek. «Espainia osoan ez dago horrenbesteko traizioa egiten duen alderdirik», adierazi zuen EAJri buruz, eta deitoratu alderdi jeltzalea izatea «PSOEren aliatu nagusia». «ETAren terrorismoaren konplize» izatea ere egotzi zion EAJri. Andoni Ortuzar EAJren EBBko presidenteak arratsaldean Laudioko (Araba) mitinean erantzun zion «laudorioa» dela Abascalek «traidore» deitzea. «Francok ere deitu zigun».

Espainiako Estatuko eredu autonomikoa gaitzetsi zuen Voxeko buruak Donostiako mitinean. «Eraso egin die lurralde nazional osoko espainiarren askatasunari eta berdintasunari».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Bizkaiko Batzar Nagusietan Usansoloren desanexioa bozkatu zen momentuan ©Marisol Ramirez/ FOKU

Galdakaoko Udalak demandatu gisa aurkeztea erabaki du Usansoloko auzian

Berria

Bizkaiko Batzar Nagusiek lurraldeko 113. udal gisa onartu zuten Usansolo, galdeketaren ostean, eta estatuko abokatutzak helegitea aurkeztu zuen. Galdakaoko Udalak demandatu gisa aurkeztea erabaki du, prozesu honetan egindako bidea defendatzeko.

 ©JON URBE / FOKU

«Adostasun berriek ahalbidetu dute bake prozesua»

Irati Urdalleta Lete

Foro Sozialaren bidea ixtear da, baina hor dago eginikoa: hamabi aholkuetatik 11 beteta edo betetzear. Eta egitekoak: adibidez, biktimen «asimetria» gainditzea. Balorazio «ona» egin dute.
 ©MARISOL RAMIREZ / FOKU

«Madrilen berme» mahaian

Jon Ordoñez Garmendia - Xabier Martin

PSE-EEn bide luzea eginikoa da Ares: sozialisten ordezkari 2005etik 2007ra bitarteko bake elkarrizketetan eta Jaurlaritzako Barne sailburu, besteak beste. Karguan zela hil zuen Ertzaintzak Cabacas. 68 urte zituela hil da.

Bake Bideak eta Bakegileak taldeek antolatu mobilizazioa Ipar Euskal Herria blokeatzeko. ©Bob Edme/ Iparla

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.