Albistea entzun

2.000 gaztek baino gehiagok izan dute istripuren bat joan den urtean

'Don't be Dummy, zuk ez duzu ordezkorik' ekitaldi ibiltaria aurkeztu du Jaurlaritzak. Gazteak kontzientziatzea da helburua
Trafiko istripuak prebenitzeko ekitaldia antolatu zuten atzo Gasteizen.
Trafiko istripuak prebenitzeko ekitaldia antolatu zuten atzo Gasteizen. JAIZKI FONTANEDA / FOKU Tamaina handiagoan ikusi

Unai Etxenausia -

2021eko azaroak 25 - Gasteiz

«Zuk ez duzu ordezkorik». Hori izan zen Dummyk, 3Dn sortutako abatar batek, 1.073 gazteri helarazi nahi izan zien mezu nagusia. Hark gidatu zuen Eusko Jaurlaritzaren Segurtasun Sailak trafiko istripuak prebenitzeko sortutako Don't be Dummy, Zuk ez duzu ordezkorik ekitaldi ibiltaria. Atzo, Gasteizko Europa jauregian aurkeztu zuten. Errepideari lotutako profesionalen zuzeneko lekukotzak, trafiko istripuetako biktimak eta haien senitartekoen testigantzak ere izan zituzten ekitaldian. Horrez gain, ikus-entzunezko lanak uztartu zituzten. Ibilgailu motordun baten gidari izateko zorian dauden edo lagunekin batera ibilgailu batean bidaiari izandako gazteen kontzientzietan eragitea da ekitaldi horien helburua. Hain zuzen, errepideak dituen arriskuez eta prebentzioak daukan garrantziaz jabetzea. Auto istripuak edo horien simulazio bideoak jarri zituzten ekitaldian. Izan ere, 2.000 gaztek baino gehiagok izan zuten iaz auto istripuren bat, Eusko Jaurlaritzak Araba, Bizkai eta Gipuzkoarako emandako datuen arabera.

Bideoetako baten amaieran, datu hau erakutsi zuten: 2020an, 25 urte baino gutxiagoko 2.128 gaztek trafiko istripuren bat izan zuten. Trafiko istripu askotan arta ematea egokitu zaio Laura Fontaneda ertzainari. Azaldu zuenez, aurreko urtean bost pertsona hil ziren Arabako errepideetan; aurten, berriz, bederatzi pertsona hil dira dagoeneko. Konfinamendu osteko ezinegonarekin lotu zuen: «Guztiok gaude urduri, ateratzeko gogoz, disfrutatzeko gogoz... eta horrek ere eragina dauka errepideetan. Gora egin du alkohol eta drogen kontsumoak».

Suhiltzaileek ere parte hartu zuten ekitaldian. Trafiko istripu bat sufritu dutenak kotxetik ateratzeaz arduratzen dira, adibidez. Tomas de la Calle eta Aitor Lopez de Agiletak errepidean ikusi eta bizi izan dutenaz hitz egin zieten gazteei; esku hartu duten istripu batzuk kontatu zituzten. Lopez de Agiletak argi esan zien «zentzudunak» izateko. De la Callek ohartarazi zien seinale ona dela errepidean haiekin ez elkartzea: «Gazteak zarete; bizitza guztia daukazue aurrean. Guk zuei ez laguntzea seinale ona da. Horrek esan nahi du autoan kontuz zoaztela».

Gazteek hainbat gogoeta partekatu dituzte. Datozen asteotan, Bilbon, Durangon eta Donostian aurkeztuko dute ekitaldia.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Herritar batzuk osasun zentrora bidean, Donostian ©Maialen Andres / FOKU

Astebetean %52 handitu da positibo kopurua Hego Euskal Herrian

Irati Urdalleta Lete

27 herritar hil dira COVID-19ak jota, iragan astean baino hiru gehiago. Orotara, 445 gaixo daude Hego Euskal Herriko ospitaleetan.

Moderna txertoaren bi bial. ©Guillaume Fauveau

Moderna txertoa baizik ez dute jarriko Iparraldeko txertaketa guneetan

Oihana Teyseyre Koskarat

Eskualdeko Osasun Agentziak erran du «dosien kontserbazioagatik» hartu duela erabakia. Pfizer txertoaren dosi bat jarri behar dutenek eta 30 urtetik beherako herritarrek osasun langile independenteengana jo beharko dute hemendik aitzina.

Ziburun hildako hiru migranteen heriotzak salatzeko protesta ©Guillaume Fauveau

Ziburun trenak harrapatuta zaurituriko etorkinak eta hiru elkartek salaketa jarri dute

Oihana Teyseyre Koskarat

Nahi gabeko hilketagatik, bizia arriskuan jartzeagatik, nahi gabeko zauriengatik, eta pozoitzeagatik jarri dute salaketa Cimade, Anafe, eta Gisti elkarteek, istriputik zauriturik atera zen etorkinarekin batera.

Ikasleak maskara jantzita, Mauleko kolegioan, iragan irailean. ©Guillaume Fauveau

Ikastetxeetako protokoloa zorroztuko dute Ipar Euskal Herrian

Oihana Teyseyre Koskarat

Hirugarren arrisku maila aplikatu beharko dute hezkuntza egoitzetan: maskara derrigorrezkoa izanen da beti, taldeak ez nahasten ahalegindu beharko dira, eta, tokiko egoeraren arabera, lizeoetan klaseen erdia etxetik egiten ahalko dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.