Noiz sortua: 2020-03-03 00:30:00

Soziolinguistikari buruzko master bat ematen hasiko da EHU irailean

Lau aditu titulu izango dira: administrazioa, arlo ez-formala, sozioekonomikoa eta euskalduntzea
Eibarren emango dituzte aurrez aurreko eskolak, bi astean behin, Ingeniaritza Eskolan.
Eibarren emango dituzte aurrez aurreko eskolak, bi astean behin, Ingeniaritza Eskolan. BERRIA Tamaina handiagoan ikusi

Garikoitz Goikoetxea -

2020ko martxoak 3

Aspaldikoa da eskaria: unibertsitatean leku handiagoa eduki behar dutela soziolinguistikari buruzko ikasketek. Datorren ikasturtean urrats bat egiteko asmoa du EHU Euskal Herriko Unibertsitateak, BERRIAk jakin duenez: bi urteko master bat jarri du abian. Honako izenburu hau izango du: Euskararen jabekuntza, kudeaketa eta hizkuntza-praktikak XXI. mendean. EHUko Euskara Institutuaren ardurapean sortu dute masterra, Eusko Jaurlaritzako Hizkuntza Politikarako Sailburuordetzak sustatuta. Euskalgintzan aritzeko langileak trebatzea dute helburu, uste baitute «profesionalen gabezia» dagoela.

Martxan jartzeko pauso gehienak eman ditu masterrak. Ebaluazio guztiak gainditu ditu, eta azken onarpen formala soilik falta du, EHUren Gobernu Kontseiluarena. Ezusterik ezean, apirileko batzarrean jasoko du baiezkoa.

Belaunaldi aldaketa dator administraziora eta euskalgintzara, eta horri aurrea hartu nahi diote masterraren bidez. 1980ko urteetan martxan jarritako erakundeetan eta egitasmoetan erretiro asko izango da datozen urteetan. «Ordezkatuko dituztenek jakin egin behar dute nolako aldaketak gertatu diren 35 urte hauetan. Egindako bidearen berri izan behar dute arlo hauetan lanean hasi aurretik». Hori azaldu dute masterraren justifikazio memorian. Kontuan izatekoa da, adibidez, euskaltegietako irakasleen laurdenek 56 urtetik gora dituztela. Erakundeetan gisakoa da egoera.

Lau zati izango ditu masterrak, eta, finean, lau aditu tituluren batura da. Lehen zatia erakunde publikoei buruzkoa da: soziolinguistikaren inguruko oinarriak landuko dituzte, euskararen bilakaerari buruzko azterketak, eta administrazioan euskara sustatzeko proiektuen kudeaketa landuko dute. Bigarrenean eremu ez-formala landuko dute: erabileraren aktibazioa, haurren eta gazteen esparrua, eta kulturaren arloa. Hirugarren zatian, eremu sozioekonomikoa: enpresetako euskara planak, eremu sozioekonomikoak hizkuntzaren biziberritzean duen garrantzia eta hizkuntza kudeaketa. Eta laugarrenean, helduen euskalduntzea: helduaroko irakaskuntzaren oinarriak, curriculuma, metodologia eta didaktika. Amaierako ikerketa lana ere egin beharko da titulua jasotzeko.

Bi urte eta 3.000 euro

Bi urteko masterra izango da, eta erdipresentziala: hamabost egunean behin izango dituzte aurrez aurreko saioak, ostiral arratsaldean eta larunbat goizean. Eibarren emango dituzte eskolak (Gipuzkoa), EHUren Ingeniaritza Eskolan. Irakasle, unibertsitatekoak ez ezik, euskalgintzan arlo horietan dabiltzan eragileetako profesionalak izango dira: Soziolinguistika Klusterra, Elhuyar, Emun, Siadeco, AEK... Matrikularen kostua 3.000 ingurukoa izango dela uste dute unibertsitateko arduradunek —Jaurlaritzak dirua jarriko du prezioak hortik gora ez joateko—.

EHUn bertan badago soziolinguistikarekin lotutako beste graduondoko bat: Hiznet. Hizkuntza plangintzari buruzkoa da, EHUk eta Asmoz fundazioak ematen dutena. Eduki batzuetan antz handia izango dute bi ikasketek. Hizneteko arduradunek azaldu dutenez, aurrera egitea da haien asmoa, irailetik aurrera ere ematea: «Ikasle kopuruak erabakiko du». Gutxieneko ikasle kopurua lortu behar dute bi graduondoek.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 1ean eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan ez da inor hil COVID-19 gaitzaren eraginez. Bost positibo atzeman dituzte PCR probekin, eta 11 gaixo ospitaleratu dituzte. Euskal Herrian 29.309 gaixok eman dute positibo guztira, koronabirusa atzemateko probaren bat eginda. Horietatik 2.066 hil dira. Grafikoak, albiste barruan.

Bizkaiko pentsionistak protestan, pasa den astean. ©Luis Jauregialtzo, FOKU

Koronabirusak zahar etxeetan izandako eragina ikertzeko eskatu du Bizkaiko Pentsionisten Mugimenduak

Berria

Protesta egin dute gaur Bizkaiko pentsiodunek Bilboko udaletxearen aitzinean, eta argi utzi dute ez dutela murrizketarik onartuko osasun publikoan eta pentsioetan. Pentsiodunek zahar etxeen inguruko informazioa eskatu diete Eusko Jaurlaritzari eta Bizkaiko Aldundiari, baina ez dute erantzunik jaso. 

Gasteizko Txagorritxu ospitaleko Mikrobiologiako langileak, proba serologikoak aztertzen. ©Gorka Rubio / Foku

Hegoaldean ez da gaixorik hil azken 24 orduetan

Andoni Imaz

Araban, Bizkaian eta Gipuzkoan ez dute PCR bidezko positiborik atzeman, hiru hilabetean lehen aldiz. Azken orduetan, koronabirusaz kutsatutako hamar lagun ospitaleratu dituzte; hiru, ZIUn.

Zahar etxeetan gertatutakoa argitzeko eskatu dute pentsiodunek gaurko mobilizazioetan. ©Aritz Loiola / FOKU

Leiho berriak mugikortasunari (eguneko laburpena)

Pello Urzelai

Euskal Herrian ez da izan hildakorik azken orduetan. PCR proba bidezko positibo berriak gutxi izan dira: bost, denak Nafarroan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna