Begiak

Bat-batean botatako bertso on batzuk izaten dira, bat-batean harrapatzen ez direlako, hala moduz joanak. Gerora harrapatuko dituzu. Iñaki Murua eta Imanol Lazkano ari ziren teman 1989ko Txapelketa Nagusiaren finalean. Murua ingeniaria eta Lazkano soldadorea itsasontzi handi bat egiten aritu ziren elkarlanean. Iritsi zen itsasontzia uretara botatzeko ordua, eta bien begien aurrean, urpera joan zen.

Errua bietan norena zen ari zirela, halako batean, Muruak honako hau bota zuen Lazkanorengatik: «Azkar gastatzen ditu laneko jornalak, lana baino lehenago juergarako planak. Berandu arte hortan besterentzat lanak, begiak soilik ditu soldadoreanak». Akaso, ajedun moxkorrak eta soldadoreak batzen dituen ezaugarria —begiak gorri-gorri eginda ibiltzea— zehazki aipatu ez zuelako ez zitzaigun une hartan hain ona iruditu.

Bertso hura etorri zait gogora, Ficoban burutu duten ekitaldi batean Gipuzkoako Foru Aldundiak eta sektoreko enpresek soldadore falta handia sumatzen dutela aitortu dutenean. Robotizazioa, sentsorizazioa, autoaspirazioa eta kontrol software berriak aipatu dituzte. Begiak babesteko, berriz, astronautenak diruditen maskarak darabiltzate. Zenbat aldatu den dena hogeita hamar urtean! Ajedunaren begigorritasuna da aldatu ez dena...