Torturaren biktimak aitortzeari buruzko testu bat onartuko dute etzi

Elkarrekin Podemoseko Pili Zabalak legez besteko proposamen bat egin du Eusko Legebiltzarrean

Enekoitz Telleria Sarriegi -

2019ko ekainak 18
Eusko Legebiltzarreko etziko osoko bilkuran torturaren biktimen aitortzari buruzko testu bat eztabaidatuko da eta, azken ordukorik ezean, onartuko dute. Pili Zabala Elkarrekin Podemoseko legebiltzarkideak erregistratu du legez besteko proposamen bat torturaren eta botere abusuen biktimak aitortzeari buruzkoa, eta gainontzeko taldeek ez diote inolako zuzenketarik egin. Horrek ez du bermatzen legez besteko proposamenak aurrera egitea, «baina bada adostasun baten seinale», legebiltzarreko iturriek BERRIAri jakinarazi diotenez.

Elkarrekin Podemosen legez besteko proposamen horretan euskal erakundeei eta, bereziki, Eusko Jaurlaritzari eskatzen zaie bat egiteko ekainaren 26an egiten den Torturaren Biktimei Laguntzeko Nazioarteko Egunarekin. Nazio Batuen Erakundeak antolatutako ekinbidea dela gogorarazten dute bertan, eta harekin bat egiteko eskaria egin, helburu jakin batekin: «Biktima horiek gizartearen aurrean aitortzea eta giza eskubideen urraketa larri horrek eragindako bidegabekeriak salatzea».

Elkarrekin Podemosek argudiatzen du tortura «delitua» dela, «eta bere praktika sistematikoa eta orokorra gizateriaren aurkako krimena». Hori dela eta, Nazio Batuen Erakundeak deitutako egun horrekin bat eginda, torturaren fenomenoari buruzko «sentsibilizazioa, kontzientziazioa eta arreta» bideratzea nahi du Elkarrekin Podemosek, «biktimak aintzat hartzeko eta konpontzeko». Gainera, haien iritziz, ekinbide hori bat dator Eusko Legebiltzarren azken hamarkadan gai horren inguruan egin diren akordioekin, eta Eusko Jaurlaritzaren bake planekin, memoriarekin eta bizikidetzarekin.

Fitxategi baten sorrera

Elkarrekin Podemosek, era berean, gai horri buruzko «fitxategi irisgarri bat» sortzea ere proposatzen du, helburu jakin batekin: «Torturak eta boterearen abusuak azken aldian gure historian izan dituen ezagutza, hedadura eta ondorioz hobetzeko. Eta arlo horretan azterlan historiko, estatistiko eta zientifikoak egitea errazteko». Haien iritziz, modu horretan, giza eskubideen urraketak jasan dituzten biktimei egia aitortzeko «oztopoak» kenduko litzaizkieke horrela: «Biktimen intimitatea, datuen babesa eta hirugarren pertsonen ohorerako eskubidea errespetatuz».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna