Albistea entzun

Instituzioen babesa eskatu dute atzerrian desagertu diren pertsonen familiek

Nun Hago elkarteak Eusko Legebiltzarrean azaldu du «babesik gabe» sentitu direla, eta familiaren araberako mailaketa antzeman dutela
Nun Hago elkarteko kideak, Giza Eskubideen Batzordean, atzo.
Nun Hago elkarteko kideak, Giza Eskubideen Batzordean, atzo. E. PORTILLO / FOKU Tamaina handiagoan ikusi

Amaia Ramirez de Okariz Kortabarria -

2019ko apirilak 11 - Gasteiz

Administrazio publikoen babesa eskatu dute Nun Hago elkarteko kideek. Blanca Martinezek eta Maria Jesus Saenzek agerraldia egin zuten atzo Eusko Legebiltzarreko Giza Eskubide eta Berdintasun Batzordearen aurrean. Nun Hago elkartea atzerrian desagertutako pertsonen senideek osatzen dute. Instituzioen «babesik gabe» sentitzen direlako egin diote eskaria familiek batzordeari. Horrez gain, salatu dute instituzioek ez dituztela senide denak berdin tratatzen, «mailakatuta» daudela, eta, ondorioz, kasu batzuk baztertzen direla. Alderdi politiko guztiek elkartasuna erakutsi diete.

Nun Hago elkarteko lehendakaria da Martinez. Haren anaia Miguel Angelen ustezko gorpua Suedian agertu zen, 2005ean. Familiari esan zioten uretan itota hil zela, eta hark zeraman NA fotokopia bati esker identifikatu zutela. Hilotzak ez zuen bihotzik. Londresen lurperatu zuten arren, Martinezek salatu du ez dagoela heriotza hura baieztatzen duen agiririk. «Ez dakigu lurperatu genuen gorpu hura nire anaiarena den; gertatu zena ikertu beharra dago», nabarmendu du elkarteko lehendakariak. Hala, eskatu du gorpu hori lurpetik ateratzeko eta autopsia egiteko.

Maria Jesus Saenz, berriz, Sabino Lloraren ama da. Haren semea 2004an desagertu zen, Floridan (AEB). Hamabost urte igaro dira orduz geroztik. Saenzek azaldu du instituzio publikoei eskatu dietela kasuan esku hartzeko: «Saioak egin ditugu administrazioekin aritzeko, baina erantzun bera jaso dugu: beti inprimaki bera betetzen ariko bagina bezala». Horrez gain, salatu du «lehen, bigarren eta bosgarren mailako» familiak daudela, eta, beraz, familia guztiek ez dutela lehentasun bera.

Halere, gaineratu du azken urteotan aurrerapausoren bat edo beste ematea lortu dutela. Azaldu duenez, Jon Iñarritu EH Bilduko senataria bidelagun, Sabino Lloraren desagerpenaren gaineko informazio gehiago lortu dute senideek.

Elkarteko kideek bi desagertu horien egoerak eraman dituzte batzordera; hala eta guztiz ere, senideek nabarmendu dute hainbat direla egoera berberean dauden familiak: Borja Lazarorena, Hodei Egiluzena... «Familia horiengatik guztiengatik gaude, hitz egin ezin dutenengatik», esan du Martinezek.

Nun Hagoko kideek hainbat eskaera egin dituzte batzordean. Iñigo Urkullu lehendakariari eskatu diote desagertutakoen familien alboan egoteko. Izan ere, senideek azaldu dute lehendakariak familia horiei elkartasuna erakutsi ziela 2016an. Horrez gain, eskatu dute adierazpen instituzional bat egitea, familiei babesa emateko.

Babesa emateko prest

Alderdiek elkartasuna erakutsi diete Nun Hago-ko kideei. Elkarrekin Podemosek, PSE-EEk eta PPk berretsi dute familiek laguntza behar dutela. Azken horrek gaineratu du ikertu behar direla Martinezen kasuan dauden «irregulartasunak». Julen Arzuaga EH Bilduko legebiltzarkideak ere babesa erakutsi die, eta administrazioen jarrera salatu du. Gaineratu duenez, ikerketetan hutsuneak egoteaz gain, ezin daitezkeela familiak sailkatu. Azkenik, Eva Juez EAJko kideak azaldu du pausoak eman direla Martinezen kasuan: Eusko Jaurlaritza harremanetan jarri da Gogora institutuarekin eta Paco Etxeberria forentsearekin.

Martinezek eskerrak eman dizkie legebiltzarkideei, eta egoeraren gogortasuna iradoki du. «Nik behar dudan bakarra hau amaitzea da». Saenzek, berriz, semea izan du gogoan; ikerketa abiatzeko eskatu du: «Nire semea ez da estatistika bat: pertsona bat da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Larunbateko manifestazioaren balorazioa egin du Euskara Aurrrera-k. ©Jon Urbe / FOKU

Euskararen aldeko «olatu berri bat» altxatzera deitu du Euskara Aurrera-k

Oihane Puertas Ramirez

Antolatzaileen arabera, dinamikak izan duen harrera «ona baino hobea» izan da, eta nabarmendu dute euskalduntzean urratsak egiten jarraituko dutela. Besteak beste, egungo garaira egokitutako hizkuntza politika berriak exijitu dizkiete administrazio publikoei.

Paziente batek gordetako <em>blister</em> edo pilula zorroak; ezkerrekoan argia da haurdunentzako ohartarazpena; eskuinekoa, berriz, abisu hori jartzen hasi aurrekoa da. ©BERRIA

Depakineren «egia» argitu arte

Arantxa Iraola

Botika bat hartzeagatik azido balproikoaren sindromedun seme-alabak izan zituzten zenbait andrek dena prest dute auzitara jotzeko. Espainiako justiziak epai bat eman du Sanofi botika etxearen aurka

«Sanofik erabaki zuen irabaziak lortzen jarraitzea»

«Sanofik erabaki zuen irabaziak lortzen jarraitzea»

Arantxa Iraola

Sanofiren aurka auzibideak martxan dituzten familien kasuak daramatza Ignacio Martinez abokatuak. Botika konpainia handia da, eta aski zaila dela aitortu du: desorekatua.

Euskal Eskola Publikoaz Harro topaguneko kideak, gaur goizean, Bilbon. ©RAUL BOGAJO / FOKU

Ekainaren 5ean kalejira «aldarrikatzailea» egingo dute eskola publikoaren alde

Olatz Enzunza Mallona

Euskal Eskola Publikoaz Harro Topaguneak «irakurketa ezkorra» egin du Arabako, Bizkaiko eta Gipuzkoako hezkuntza akordioaren inguruan. Eskola publikoa hezkuntza sistemaren erdigunean jartzen ez duela salatu dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.