Koronabirusa. Hezkuntza

Itzulerako osasun neurriak langileekin negoziatzeko exijitu dute sindikatuek

Hezkuntza Sailaren «aldebakarreko» erabakia salatu dute. Ikastetxeak errefortzurako eta selektibitatea prestatzeko ireki dira, haien arabera
<b>ELA, LAB, UGT, CCOO eta Steilas sindikatuek protesta antolatu zuten atzoko, Gasteizen.</b>
ELA, LAB, UGT, CCOO eta Steilas sindikatuek protesta antolatu zuten atzoko, Gasteizen. JAIZKI FONTANEDA / FOKU Tamaina handiagoan ikusi

Amaia Ramirez de Okariz Kortabarria -

2020ko maiatzak 26

Sindikatuetako ordezkari ugari batu da Eusko Jaurlaritzako Lakuako egoitza nagusiaren aurrean, Gasteizen. COVID-19aren garaiotan, hezkuntzaren kudeaketa dute protestarako gai. Bertaratu diren gehienek maskarak dituzte jantziak, eta bada eskularruak dituenik ere. Segurtasun distantzia mantentzen ari dira elkarren artean, eta, bien bitartean, orain arteko jardunari buruz hitz egiten dabiltza zenbaitzuk; ea telelana zer moduz, ea zer gertatuko den azterketekin, eta abar. Egiari zor, arduratuta daudela dirudi, elkarrizketetako bakoitzean kezka ugari plazaratzen baitituzte. Goizeko hamaika eta erdietan isiltasuna nagusitu da, eta bide eman diote elkarretaratze isilari.

ELA, LAB, UGT, CCOO eta Steilas sindikatuek egindako mobilizazioan salatu dute Hezkuntza Sailak eskolara itzultzeari dagokionez «aldebakarreko eta presazko erabakiak» hartu dituela. Hori ikusirik, itzulerako «plangintzak, baldintzak, segurtasun eta osasun neurriak eta protokoloak» langileen ordezkariekin negoziatzeko exijitu diote; baita iraileko ikasturte hasierari begira ere. Izan ere, DBH4, Lanbide Heziketa eta Batxilergoko bigarren mailako ikasleentzat ikastetxeak ireki zituzten atzo Araban, Bizkaian eta Gipuzkoan. Halere, sindikatuek emandako datuen arabera, ateak irekitzea erabaki zuten eskolak «oso gutxi» dira. Gainera, Jaurlaritzak jakinarazi zuenez, haietako bakoitzak autonomia dauka itzulera erabaki ahal izateko.

Protestan ari direnek orri beteko kartelak dituzte eskuetan, eta aldarriak daude haietako bakoitzean. Pankarta nagusiak dakar leloa: «Itzulera segurua negoziatu». Irati Tobar LABeko ordezkaria bertan da. Bost sindikatuen izenean hartu du hitza komunikabideen aurrean, eta, azaldu duenez, ia ikastetxe gehienek bat egin dute sindikatuek ikasturte amaierarako helarazitako proposamenekin, eta, soilik, errefortzurako edo selektibitatea prestatzeko ireki dituzte eskolak lehen egunean. «Zorionak eman nahi dizkiogu hezkuntza komunitateari, egin dugun presioaren ondorioz lortu baitugu itzulera soilik bi kasu horietan egitea, eta segurtasun bermeak egonda», gaineratu du.

Hezkuntza Sailari erantzukizuna bere gain hartzeko eskatzen dion mezua idatzita duten orriak dituzte langileetako batzuek eskuetan, eta Tobar ere antzera mintzatu da. Haren arabera, sindikatuek eta hezkuntza komunitatearen «gaitzespenak eta presioak» eragina izan du sailaren erabakien aldaketan, baina adierazi du oraindik ere «larria eta arduragabea» dela hark duen jarrera. «Ikastetxe bakoitzaren autonomia aitzakiatzat hartuz, ikastetxe bakoitzaren esku utzi nahi izan du itzuleraren nondik norakoa erabakitzeko ardura eta pisua». Esate baterako, nabarmendu du ikastetxe batzuek ez dutela jaso beraiek egindako itzulera planaren erantzunik, eta ez dakitela oniritzia duten ala ez.

Jarraipena eta mobilizazioa

Konfinamenduaz geroztik, lehen eguna dute ikastetxe batzuek ateak irekita, eta, ordutik, asko aldatu da irakasteko eta ikasteko era. Orain, lehen baino neurri gehiago hartu behar dira, eta, hori oinarri izanda, bada beste mezu bat ere protestan ari diren pertsonen artean: «Osasuna eta segurtasuna bermatu». Tobarrek jakinarazi duenez, sindikatuen arteko jarraipen batzorde bat antolatu dute, eta ikastetxez ikastetxe osasun bermeak dauden ziurtatzea da helburua. «Batzordean eskoletako egoera kasuz kasu jarraituko dugu, eta langileekin ere harremanetan egongo gara jarraipena egin ahal izateko». Areago, azaldu du zuzendaritzetara ere galdetegi bat bidali zutela, segurtasun eta osasun baldintzak betetzen ote ziren ikusteko.

Jarraipen batzordeak osasun bermeetan hutsuneren bat identifikatuz gero, ez dute mobilizatzeko aukera baztertzen. LABeko ordezkariak ohartarazi duenez, osasuna bermatzen ez den eskoletan hainbat mobilizazio eta ekintza egingo dituzte osasuna bermatu arte, eta, horretarako, «beharrezkoak diren tresnak» jarriko dituzte mahai gainean. Halere, ez du aurreratu zer egiteko asmoa duten: «Kasuistika guztiak aztertu behar dira batzordean, eta ondoren egingo dira mobilizazioak guztion adostasunarekin». Azken hitz horiekin eman dio amaiera Tobarrek hitzartzeari, eta minutu gutxira amaitu da protesta. Txalo zaparradak puskatu du isiltasuna.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Pertsona batzuk maskararekin pasa den astean, Orion (Gipuzkoa). ©Jon Urbe / FOKU

Getariako Udalak, hiru kasuren berri eman, eta Osasun Sailaren jarrera salatu du

Amaia Ramirez de Okariz Kortabarria

Eusko Jaurlaritzako Osasun Sailari eskatu diote zuzenean emateko egon daitezkeen positiboen berri eta hartzeko herritarrak babesteko hartu beharreko neurriak. Azpeitiko (Gipuzkoa) Udala ere kezkatuta dago.

Jendea maskara jantzia duela, lehengo astean, Gasteizen. ©JAIZKI FONTANEDA / FOKU

Beste 33 positibo atzeman dituzte; horietako 11, Bilbon

Arantxa Iraola

Esan dute ez dagoela motiborik Bizkaiko hiriburuan agerraldi bat dagoela adierazteko. Espainiako Gobernuak plan berri bat atondu du epidemiari aurre egiteko irizpideekin; erkidegoei aurkeztu die.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna