Albistea entzun

Apaolazak, Bilbaok eta Mutuberriak irabazi dituzte Euskadi sariak

Uxue Apaolazaren 'Bihurguneko nasa' ipuin bilduma saritu dute narratiban, Leire Bilbaoren 'Barruko hotsak' poema liburua haur eta gazte literaturan, eta Maite Mutuberriaren 'Irrimola' ilustrazio lanean
Maite Mutuberria, Leire Bilbao eta Uxue Apaolaza, atzo, Gasteizko Artium museoaren atarian, sarien berri emateko agerraldia hasi baino lehen.
Maite Mutuberria, Leire Bilbao eta Uxue Apaolaza, atzo, Gasteizko Artium museoaren atarian, sarien berri emateko agerraldia hasi baino lehen. RAUL BOGAJO / FOKU Tamaina handiagoan ikusi

Aitor Biain -

2022ko urriak 14 - Gasteiz

Literaturako Euskadi saridun berrien aurreneko izenak dira: Uxue Apaolaza, Bihurguneko nasa ipuin liburuagatik; Leire Bilbao, Barruko hotsak poema liburuagatik; eta Maite Mutuberria, Irrimola liburuko ilustrazio lanagatik. Atzo ezagutarazi zituzten Gasteizen, Artium museoan egindako agerraldian, eta han izan ziren Bingen Zupiria Eusko Jaurlaritzako Kultura eta Hizkuntza Politikako sailburua eta Andoni Iturbe Kultura sailburuordea ere. Ordezkari gisa baino gehiago, irakurle gisa eskerrak emanez hasi zuen agerraldia Zupiriak, hala ere: «Eskerrik asko irakurle garenoi istorioak, ilustrazioak, pertsonaiak eta sentimenduak eskaintzeagatik, eta horien bitartez gure iruditeria eta imajinazioa lantzen laguntzeagatik». Eta gogorarazi zuen izenak jakinaraztea soilik dagokiola hari, aukeraketa beste idazle eta ordezkari batzuek egiten dutelako.

Hain zuzen ere, Leire Otaegik, Ane Labakak, Jon Martinek, Yurre Ugartek eta Josu Jimenezek erabaki dute Apaolazaren lana saritzea. Epaimahaikideen hitzetan, Bihurguneko nasa (Susa) liburuak «identitatearen eta alteritatearen inguruko hausnarketa aberatsa» eskaintzen du.

Apaolazak iazko azaroan argitaratu zuen liburua, Susa argitaletxearekin. Egilearen hirugarren lana bederatzi ipuinek osatzen dute, eta hiria da kontakizun guztiak lotzen dituen haria, Madril; baita Lur narratzaile eta protagonistaren ahotsa ere. Bada, kontakizunen «prosa gihartsua» nabarmendu du epaimahaiak bereziki. «Edukiari ederki egokitzen zaion hizkera da, hiri handiko herrestaren dinamika bizian —ustekabean— irakurleak protagonistaren begirada ernea sumatuko du detaileen tolesturetan sakontzen».

Oraindik albistea barneratu ez bazuen ere —«loteria langile auzoetan tokatzen denean bezala nago, kokatu ezinik oraindik»—, esker onez agertu zen Apaolaza liburuari egindako aitorpenagatik. Eta liburuaren formatuan nahiz edukian egin nahi izan zuen azpimarra: «Fikzioa dira, eta irakurtzeko dira; ez dira entzuteko ipuinak, ez ozen irakurtzekoak».

Leire Bilbaoren Barruko hotsak (Pamiela) liburua, aldiz, «belarriekin irakurri eta begiekin entzuteko modukoa» da, epaimahaiaren iritziz. Manuel Lopezek, Larraitz Idarretak, Karla Fernandez de Ganboak, Ziortza Onaindiak eta Patxi Zubizarretak osatu dute kategoria horretako epaimahaia, eta idazleari aitortu diote «poesia bisuala» landu izana, baita «kaligramaren generoa» berritu izana ere, errimak eta erritmoak baliatuta. «Nabarmentzekoa da, orobat, liburuaren konposizio, maketazio eta ilustrazio lan bikaina».

Iazko abenduan aurkeztu zuen liburua. Haurren egunerokoan dauden barneko nahiz kanpoko soinuekin jolas eginez, hotsak poema bihurtu zituen idazleak. Onomatopeiak eta kaligramak erabili zituen bildumaren kontakizuna osatzeko, eta, hala, ume baten egunaren soinu banda izan daitekeena jaso zuen poesia bilduman. Bada, idazleak irakurleei eskatu die, «ume zein heldu izan», liburua irakurtzean nork bere «soinu banda propioa» aurkitzeko.

Bigarrenez jaso du haur eta gazte literaturako Euskadi saria Bilbaok; 2017an Xomorropoemak eta beste piztia batzuk liburua saritu zioten. Maite Mutuberria ilustratzailea izan zuen bidelagun orduan, eta baita orain ere. Bada, idazleak adierazi zuen «poz bikoitza» zuela, Mutuberria ere saritu dutelako aurten.

Mutuberria, baina, ez dute lan horregatik saritu, Irrimola (Ikaselkar) liburuagatik baizik. Iaz argitaratu zuen lana; poza du ardatz, eta berezitasunik handiena zera da: forma borobila duela. Javier de Isusi, Maria Altuna, Jon Mantzisidor, Yolanda Mosquera eta Miren Asiain epaimahaikideen iritziz, Mutuberriaren lanak album ilustratuaren kontzeptua «beste dimentsio batera» eramaten du, hain zuzen ere. «Haurtzarotik literaturara sartzeko ate bat da. Jolaserako eta alaitasunerako oda bat».

Mutuberriak aitortu zuen baietz, itxura «berezia» duela lanak, baina prozesua ere halakoxea izan zela. «Polita da hitz horiek entzutea, etxean, bakarrik, lanean ari garenean, batzuetan ez baitakigu inork ulertuko duen egiten saiatzen ari garen hori».

Azaroaren 24an, Donostiako Tabakalera Kultura Garaikidearen Zentroan egingo dute sariak banatzeko ekitaldia. Guztira zazpi sari banatuko dira, eta datorren astean iragarriko dituzte falta diren beste lau kategorietakoak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zugaza, Herraez, Gonzalez, Zupiria eta Ormazabal, gaur, Gasteizen. ©IREKIA

Euskal artisten 26 artelan erosi dituzte museoek, Jaurlaritzak diruz lagunduta

Aitor Biain

Artium museoak, Biboko Arte Ederren Museoak eta Tabakalerak elkarrekin erosi dituzte 18 euskal artistaren obrak, 200.000 euroko ezohiko diru laguntza bati esker.

2023ko Bertsoaoa zikloko irudia, Leire Urbeltzek egina. ©Nafarroako Bertsozale Elkartea

Iruñeko Bertsoaroa otsailaren 9tik martxoaren 2ra eginen dute

Berria

Nafarroako Bertsozale Elkarteak eta Iruñeko Udalak antolaturik, sei emanaldirekin osatu dute zikloaren egitaraua. Lehenbiziko aldiz, bertso afari bat ere izanen da.

Gorka Moreno, Amaia Ozerin eta Patxo Telleria, gaur goizean, 'Sormen Ola' proiektuaren aurkezpenean. ©OSKAR MATXIN EDESA / FOKU

Gazteentzako tailer sorta bat antolatu dute Loraldiak eta EHUk

Olatz Enzunza Mallona

Gazteen artean euskal kulturaren transmisioa sustatzeko asmoz, Sormen Ola programa abiatu dute Loraldiak eta EHUk. Parte hartzaileek formakuntza tailerrak jasoko dituzte hilean behin, sortzaile profesionalek gidatuta. Larunbatean egingo dute lehenengo saioa.

Slawka Grabowska eta Amaia Garcia antolatzaileak, Mari Jose Telleria Gipuzkoako Kultura diputatua eta Olatz Osa Elkar argitaletxeko zuzendaria, gaur goizean, jaialdiaren aurkezpenean. ©Jon Urbe / Foku

Otsailean egingo dute Lumafest jaialdia Donostian, bigarrenez

Naroa Torralba Rodriguez

Zabalik dago mikrokontakizunak bidaltzeko epea. Otsailaren 9tik 11ra tailerrak eta hitzaldiak izango dira Koldo Mitxelena kulturunean.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.