Albistea entzun

IRITZIA

Kontatzea zilegi

Kattalin Miner -

2022ko urriak 7

Egia esan, ez dakizu sariak berak duen halako garrantzia ala sari horrek esan nahi duena den inportanteena, baina eguerdian, ordenagailu aurrean Annie Ernauxen izena irakurri duzunean, poz ia pertsonal gisa egin duzu oihu.

Ikusi gehiago: Ernaux: hitzik gabe geratzeko idaztea

Liburuz beteriko apalei begiratu diezu eta han ikusi dituzu bere bederatzi lan. Lehenengoa, zikindua, erabilia, milatan irakurria da gehien maite duzuna: Pasio hutsa (Igela). Hamasei urte zenituen irakasle baten gomendioz liburua esku artean izan zenuen hartan. Maitalearen deia ez entzuteko beldurrez aspiragailua ere pasatzen ez zuen andrearen kontakizuna irakurri zenuen adi. Noizbait norbait hala desiratzeko antsia eta beldurrak egin zuten leku zugan. Gaur arte.

Egun, hemezortzi urte beranduago, oraindik irrika txoroz itxaroten duzu Ernauxen liburu berri bakoitza. Etxekotu egin duzu, nola dagoen jakin nahi duzu, edozer konta diezazun behar duzu. Askotan, azken liburuekin batez ere, pentsatzen duzu Annierekin paseatu nahi zenukeela errutinaz jositako Parisen barrena. Bestela gorroto duzun hiri hori idazlearen begietatik bakarrik maitatzen ikasi duzu, bere supermerkatuetako argi eta guzti.

Zuk ez zenuen Annie Ernauxek Nobel saria irabaz zezan behar, edo ez zenuen hori uste behintzat; dakizun bakarra da idazle horri esker ere bazarela idazle. Ez, akaso, nahi zenukeen idazle mota, hori ere egia da, gehiegitan ekiten baitiozu idatzitakoa irakurri ostean, beldurrak jota, hitzak ezabatzeari, aldatzeari, isiltzeari. Zuk ere izan nahi zenuke Ernaux eta bota beharrekoak bota, zure memoria galbahe bakar, zure irizpidea iragazki nahikoa zilegi. Baina bere ausardia, kontatzeko manera eta autozentsura falta imitatuko dituzun fantasian murgiltzen zara, zain. Hala ere, bere barkamenik eta baimenik ez eskatzeko aldarriak uste baino indar handiagoa eman dizu, eta badakizu.

Hainbeste urteren ostean, beraz, emakume handi horren bizitza inguruko askorena baina hobeto ezagutzen duzun ziurtasunez, telefonoz deituko zenukeen lagunarekin bezala pozten zara. Poztu eta eskertu, kontatutakoak kontatu izanagatik, esateko modu hain konplexurik gabea lortu izanagatik, dena liburu batean idazteko bezain interesekoa dela erakusteagatik, eta zergatik ez, autofikzioa literatura ez dela hainbestetan aipatu duten gizon horien hitzak irribarrez akordura ekartzeagatik.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Bertsolari Txapelketa Nagusiko finalaurrekoa, 2 itzulia: Bilbo

Bilbon erabakiko da zein zazpi bertsolari sailkatuko diren finalerako

Olatz Enzunza

Zazpigarren eta azken finalaurrekoa jokatuko da gaur Bilbon. Aitor Mendiluze Gonzalez, Amets Arzallus Antia, Joanes Illarregi Marzol, Jone Uria Albizuri, Maddalen Arzallus Antia, eta Saioa Alkaiza Guallar arituko dira kantuan. Idoia Anzorandia Kareaga izango dute gai jartzaile.
 

Aitor Mendiluze eta Amets Arzallus, atzo, elkarrekin kantuan, hamarreko txikiko ariketan. ©MARISOL RAMIREZ / FOKU

Ez da ate ondoan geratu

Miren Mujika Telleria

Amets Arzallusek Bilbon irabazi ondoren, erabakita gelditu da finala. Harekin batera ariko dira Illarregi, Ibarzabal, Gaztelumendi, Colina, Mendiluze, Martin eta Lujanbio
 ©ARITZ LOIOLA / FOKU

«Beharbada gu ere iraultza bat bizitzen ari gara»

Itziar Ugarte Irizar

Etorkizun hurbilean, Parisen, hiria errefuxiatu klimatikoz beteta dagoenean eta ia jende guztiak errealitate birtualerako betaurrekoak aldean daramatzan inguru batean girotu du idazleak 'Berriz zentauro' eleberria. Agertokiak agertoki, baina, adin ertaineko emakume baten galderak ikusten ditu ardatzean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.