Albistea entzun

Nafarroako inbestidura. Gobernu akordioa

Gobernu akordioa lortu dute PSN, Geroa Bai, Ahal Dugu eta Ezkerrak

Inbestidura aurrera ateraz gero, hamahiru departamendu izango dira: sozialistek zortzi lituzkete; Geroa Baik, lau; eta Ahal Dugu-k, bat. Txibiteren arabera, itunak PSOEren babesa dauka
Eduardo Santos (Ahal Dugu), Maria Txibite (PSN) eta Uxue Barkos (Geroa Bai), atzo, Iruñean, Nafarroako Parlamentuan, gobernu akordioa lortu ondoren.
Eduardo Santos (Ahal Dugu), Maria Txibite (PSN) eta Uxue Barkos (Geroa Bai), atzo, Iruñean, Nafarroako Parlamentuan, gobernu akordioa lortu ondoren. VILLAR LOPEZ / EFE Tamaina handiagoan ikusi

Joxerra Senar -

2019ko uztailak 27 - Iruñea

Espainian Pedro Sanchezen inbestidura aurrera atera ez izanak ez du ondoriorik izan Nafarroan. Sanferminen bezperan hurrengo legealdirako akordio programatikoa hitzartu ondotik, atzo gobernuaren egitura zehaztu zuten PSNk, Geroa Baik, Ahal Dugu-k eta Ezkerrak —azken hori ez da han sartuko—. Maria Txibite PSNko kidearen inbestidura aurrera aterako balitz —EH Bilduko militanteen eskuetan egongo da zer erabaki hartu—, gobernuak hamahiru departamendu izango ditu: sozialisten eskuetan zortzi egongo dira, Geroa Baik lau izango ditu, eta Ahal Dugu-k, bat. Alderdiok azpimarratu zutenez, «ez da kuoten gobernu bat izango».

Alderdi bakoitzeko barne organoek berretsi arte, ez da behin betikoa izango. Dena den, zuzendaritzek babesa eman diotenez, ez da ustekaberik espero. Bihar bertan, PSNk militanteei galdetuko die akordioaren edukiari buruz. «Ez dut inongo zalantzarik baiezkoa izango dela erantzuna, eta, emaitza hori izan bezain azkar, igandean bertan parlamentuko presidenteari deituko diot iragartzeko inbestidura prozesura aurkeztuko naizela», azaldu zuen Maria Txibitek, atzo.

Gauzak asko azkartu daitezke. Etzi, Nafarroako Parlamentuko Mahai eta Eledunen Batzordea bildu daiteke. Hortik aurrera, Unai Hualde parlamentuko presidenteak bilera sorta bat antolatu behar du alderdien artean hautagairik baden galdetzeko. Tramite hori beteta, inbestidura saioaren data zehaztea falta da. PSNk ostegunean izatea nahi du, abuztuaren 1ean, baina urrats horiek guztiak egin arte ezingo da jakin. Ostiralean ere izan liteke, baina horrek hurrengo astera atzeratuko luke bozketa erabakigarria: lehendakari izendatzeko, gehiengo sinplea behar du Txibitek, eta, lehen bozketan gehiengo osorik izango ez duenez, hori gertatu eta 24 ordura egin behar da bigarren botazioa; hor gehiengo sinplea nahikoa da, eta behar dute, gutxienik, EH Bilduren abstentzioa.

Gobernu organigramaren eztabaidak uste baino zailtasun gutxiago izan du. Iragan astean hasi zuten negoziazioa, baina, PSNk astebete atzeratu zuenez bilera, Espainiako inbestidura prozesuak elkarrizketa baldintzatu zezakeen. Alta, egunotan, PSNk eta Geroa Baik bederen elkarrizketak izan dituzte, eta atzoko bilerara lanak aurreratuta joan ziren.

Eguerdian hasi zen bilera, eta, handik ordu erdira, Ezkerrako ordezkariak atera egin ziren aretotik. Marisa de Simonek adierazi zuen akordio programatikoa izenpetu dutela eta gobernu antolamenduaren gainean ez dutela hitz egin nahi izan, ez direlako gobernuan sartuko. «Aurreko urteetan hasitako politika sozialekin jarraitzeko akordio nahikoa da, edukietan sakontzen baitu». Leial jokatu nahi dute, euren profilari eutsiz.

Ondoren, beste bi ordu eta erdi iraun zuen bilerak. Halako batean, Geroa Baiko eta PSNko ordezkariak bileratik atera ziren Ahal Dugu-k egindako proposamen bat aztertu asmoz. 15:00ak pasa eman zuten akordioaren berri.

Gobernuak bi lehendakariorde izango ditu; PSNkoa eta Geroa Baikoa. Departamenduen izenei begira, berritasunak daude. Adibidez, Hezkuntzatik at, Unibertsitateak, Berrikuntza eta Eraldaketa Digitala bilduko dituen sail bat egongo da. Halaber, Lurralde Kohesioa departamendua izango da. Politika ekonomikoei dagokienez, Garapen Ekonomikoa eta Enpresariala egongo da, azken legealdian Manu Aierdik (Geroa Bai) zuzendutakoaren baliokide. Dena den, Ogasun departamenduak ere Ekonomia izena ere hartu du. Ahal Dugu-k Migrazio Politikaren eta Justiziaren ardura hartuko du.

«Poz-pozik» azaldu zen Txibite. Haren ustez, garapen ekonomikoan sakontzeko apustu egin dute, eta, antolamendu horren bidez, lurralde desorekari aurre egingo diote. PSNkoaren esanetan, «Madrilek» badu organigramaren berri, eta akordio osoak, gainera, PSOEren babesa du.

Ahal Dugu-ko Eduardo Santosek «elkarrizketarako borondate ona eta tonu egokia» eskertu zituen. «Politika egin daiteke, eta pertsona desberdinen artean hitzarmenak».

Uxue Barkosen (Geroa Bai) arabera, «orain lan egin behar da inbestidurarako gehiengo nahikoa lortzeko». Uste du itunak aniztasuna islatzen duela eta elkarbizitzarako bokazioa daukala.

EH Bilduren esku

Elkarrizketen hasieratik, PSNk ez du EH Bildurekin ezer jakin nahi izan, baina talde subiranistaren abstentzioa behar du ezinbestean. Atzo, EH Bilduko Adolfo Araizek ohartarazi zuen «politika fikzioa» dela bere taldea aintzat ez hartzea hala inbestidurarako nola ondoren legealdirako.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskal herritarrek 154 gailur piztuko dituzte Pirinioetako Bidean

Euskal herritarrek 154 gailur piztuko dituzte Pirinioetako Bidean

Jon O. Urain

Pirinioetako hirurehun gailur baino gehiago argiztatuko dituzte bihar, Euskal Herriaren eta Kataluniaren burujabetzaren alde. Zuzeneko saio bat ere prestatu dute, eta Berria.eus-en ikusgai egongo da: 21:00etatik 22:30era izango da.

Protesta Melillan, 37 pertsonen hilketaren ostean. ©F.G.Guerrero

Melillako hilketak salatu dituzte EAJk, EH Bilduk eta Elkarrekin Podemos-IUk

Iñaut Matauko Rada

Eusko Legebiltzarreko hiru alderdi horiek adierazpen bateratua egin dute, Melillako hilketak gaitzetsi eta Pedro Sanchezen hitzak arbuiatzeko.

Juana Balmaseda batzordeburua, atzo, Eusko Legebiltzarrean, txostena aurkezten. ©Jaizki Fontaneda / Foku

Egiari Zor fundazioak «txalotu» egin du Poliziaren 46 biktima aitortu izana

Berria

Poliziaren Biktimen Balorazio Batzordearen «profesionaltasuna» goratu du, eta prozesuan «konfiantza» sortzeaz mintzatu da.

 ©Aritz Loiola / Foku

«Herri gogoa berpizteko ekimen bat izango da»

Iosu Alberdi

Gure Esku-k eta Kataluniako zenbait eragilek Pirinioetako 400 tontor argiztatuko dituzte larunbatean. Europari mezu bat bidali nahi diote: «Erabaki nahi dugun bi herri gara». 

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...