Albistea entzun

Esako urtegia

Mea ustiaketa urtegi ondoan

Espainiako, Nafarroako eta Aragoiko gobernuek Muga meategia ustiatzeko baimena eman diote Geoalcaliri. Ekologistek berretsi dute ingurumenari kalte eginen diola.

Muga meategiak izanen duen itxura, Geoalcali enpresako kideek sortutako irudi batean. Lantegia Zangozako lurretan egonen litzateke.
Muga meategiak izanen duen itxura, Geoalcali enpresako kideek sortutako irudi batean. Lantegia Zangozako lurretan egonen litzateke. GEOALCALI Tamaina handiagoan ikusi

Edurne Elizondo - Nafarroako Hitza

2021eko uztailak 29 - Iruñea

Muga meategia ustiatzeko baimena eman diote Geoalcaliri, eta kezka iturri da, hainbat eragilek uste baitute Esako segurtasunean eragin dezakeela. Ez bakarrik Ekologistak Martxan-ek, Ebroko Ur Konfederazioak berak ere ohartarazi du Esari eragiteko arrisku horretaz; Zangozako Udalak ere onartu du urtegia handitzeko lanek sortutako kezkak «gora» egin duela meategi proiektuarekin.

 

Baina badu baimena: Geoalcali enpresaren Muga meategi proiektuak badu gatza eta potasa ustiatzeko baimena; uztailaren 1ean sinatu zuten Espainiako, Nafarroako eta Aragoiko gobernuek. Hiru administrazio horien oniritzia behar zuen meategiak, Nafarroako eta Aragoiko (Espainia) lurrak ukitzen dituelako. Lantegia Zangoza ondoan eginen dute; meatze ahoa, berriz, Aragoiko Undues de Lerga herrian. 1.700 hektareako luze-zabalera izanen du meategiak, eta 600 metro sakon diren tunelak eraikiko dituzte, lur azpian.

Geoalcalik urrats bat egin du aurrera Muga meategia ustiatzeko baimenarekin; ez da azkena, halere. Horixe nabarmendu du proiektu horren kontrako plataformako kide Enrique Mirandak, eta garbi erran du helegitea aurkeztuko dutela Mugak jasotako baimenaren aurka. Zangozako Udaleko alkate Lucia Etxegoienek ere horixe nabarmendu nahi izan du: «Ustiatzeko baimena egin beharreko urrats bat da, baina bidea ez da amaitu».

«Zuhurtziaz» jokatzeko beharra aipatu du alkateak. «Proiektua aspaldikoa da, eta orain arteko bidean hobera egin du, Zangozako Udalak eta bertze zenbait erakundek egindako zuzenketei esker; hemendik aurrera ere adi aztertu beharko ditugu emandako pauso guztiak», erran du Etxegoienek.

Geoalcaliko arduradunek eman zuten jasotako baimenaren berri, uztailaren 5ean, enpresaren webgunean jarritako bideo baten bidez; Geoalcaliko zuzendari nagusi Ignacio Salazarrek hartu zuen hitza bideo horretan: «Hagitz kontent gaude. Berehala hasiko gara meategia eraikitzeko lanak prestatzen». Geoalcaliko arduradunek nabarmendu dute ingurumena zaintzeko behar diren «neurri guztiak» hartu dituztela kontuan, eta proiektuak ukitzen dituen «alde guztiei» eman dietela hitza prozesuan.

Hurrengo urratsa izanen da meategia eraikitzeko proiektua egitea. Meategia eraikitzeko Zangozako Udalaren lan baimena beharko du Geoalcalik, eta Mirandak zalantzan jarri du hori lortzeko aukera. «Udalaren egungo planari so, zaila izanen da, meategiko lantegiak hartuko lituzkeen lurretan planak babestutako zenbait baso eremu daudelako». Zangozako Udaleko alkateak uxatu ditu Mirandaren zalantzak: «Nafarroako Gobernuak erran digu jada udal plana moldatu beharko dugula enpresari lanak egiteko baimena eman ahal izateko», ezagutarazi du Etxegoienek. Plana aldatzeko prest da udala.

Kezka segurtasunarekin

Muga proiektuaren aurkako plataformak garbi du meategiak «kalte handia» eraginen lukeela ingurumenean. Nafarroako Ekologistak Martxan erakundeak ere salatu du proiektua. Meategiaren aurkakoek erdigunean jarri dituzten auzien artean daude hondakinena, sismikotasunarena —Loitiko faila dago inguruan; administrazioak, hain zuzen, sismografo sare bat jartzera behartu du Geoalcali—, eta Esako urtegiari eragiteko arriskuarena.

Geoalcaliko arduradunek azaldu dute, hain zuzen, «ingurumena eta segurtasuna zaintzeko baldintzapean» jaso dutela ustiatzeko baimena. «Ohiko prozedura da hori», erantsi dute enpresako kideek. Administrazioaz gain, proiektuaren aurkakoak ere adi izanen dituzte.

 

Informazio osagarria: Mea ustiaketa urtegi ondoan.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

«Euskarak izan behar du hezkuntza sistemako hizkuntza normalizatua»

«Euskarak izan behar du hezkuntza sistemako hizkuntza normalizatua»

Imanol Magro Eizmendi - Arantxa Iraola

Euskalgintzako eta kulturgintzako pertsona ezagunak batu ditu Euskalgintzaren Kontseiluak eta aldarrikatu dute euskara eta euskal kultura ardatz izan behar dituela Araba, Bizkai eta Gipuzkoarako ontzen ari diren Hezkuntza Legeak

Eusk Jaurlaritzak, foru aldundiek eta Bilbo, Donostia eta Gasteizko Udalek Euskararen Eguna ospatu dute Gasteizen ©Irekia

Euskararen alde adostasunak josteko aldarria, aho batez

Edurne Begiristain

Euskararen Nazioarteko Eguna da gaur, eta hura ospatzeko ekitaldi eta adierazpen ugari egin dituzte instituzioek, alderdiek eta eragileek. Eusko Jaurlaritzak, foru aldundiek eta Bilbo, Donostia eta Gasteizko alkateek duela 40 urte Euskararen Legeak lortutako adostasuna goratu dute. EH Bilduk esan du euskararen alde «adostasun berriak» eraikitzeko unea dela.

Euskal Hedabideen emankizuna, goizean, Baionan. ©Kanaldude

Euskalgintzaren prekaritateari aurre egitea «zaila» izanen da energiaren kariotze garaian, Kurutxarriren ustez

Oihana Teyseyre Koskarat

Ipar Euskal Herriko Euskal Hedabideek emankizun berezia egin dute goizean, Baionan. Euskaraldiaren biharamunean, bilana egin dute, eta euskalgintzaren prekaritatea ere izan dute aipagai.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...