Torturaren zauriz

13/13 sumarioko zortzigarrena zen, baina ezin izan zen uztailean Espainiako Auzitegi Nazionalera joan. Ez pozez, haatik: haren osasun egoerak eragotzi zion. Juan Mari Jauregi militante independentista donostiarra atzo zendu zen; Sortuk jakinarazi zuenez, bertzeak bertze, torturak eta auzibide luzeak eragindako zaurien ondorioz: «Torturak osasunari kalte egin zion, eta sumarioa hamarkada batez luzatzeak oinazea areagotu baino ez zion egin».

LABeko militante erretiratua zen Jauregi atxilotu zutenean: 66 urte zituen. 2010eko apirilaren 14an atzeman zuen Guardia Zibilak, eta torturak salatu zituen aske utzi zutenean. Arritmia zeukan orduan: «Nire eritasunaz ohartu zirenean, esan zidaten han gelditzen banintzen, hiltzen banintzen, ez zela ezer gertatuko. [Jon] Anzarena bezala izango zela». Hotza eta beroa pasarazi zioten; biluztu eta mehatxatu egin zuten.

13/13 auziko gainerako auzipetuek «elkartasun, konpromiso eta duintasun eredu» gisa oroitu dute.