Noiz sortua: 2019-05-17 00:30:00

Udal eta foru hauteskundeak. Gipuzkoa

EAJk 200 milioi bideratu nahi ditu «kalitatezko» enplegua sustatzeko

Olanok hiru ardatzetan bildu ditu jeltzaleen asmo ekomikoak: «enpresa indartzea», lanen «kalitatea hobetzea» eta «ekonomia berria» bultzatzea
Markel Olano EAJko diputatugai nagusia, atzo, Tolosan.
Markel Olano EAJko diputatugai nagusia, atzo, Tolosan. BERRIA Tamaina handiagoan ikusi

Jon O. Urain -

2019ko maiatzak 17

Gipuzkoako Foru Aldundian jarraituz gero, EAJk asmoa du 2019-2023 legealdian zehar 200 milioi euro bideratzeko ekonomia alorreko hiru ardatzetara: «Enpresaren indartzea, enpleguaren kalitatearen hobekuntza eta ekonomia berriaren bultzada». Markel Olano EAJren Gipuzkoarako diputatugai nagusiak azaldu duenez, jeltzaleek «enplegua eta ekonomia berria sustatzeko planean» jasoko dituzte xede eta diru sail horiek.

Tolosan eta Usurbilen izan zen atzo Olano, bi udalerrietako Lanbide Heziketako zentroetara bisitan joanda. Horietan aurkeztu zituen jeltzaleek alor ekonomikoan dauzkaten asmoak datorren legealdirako: «Gure helburua Gipuzkoako lehiakortasun ekonomikoa indartzea da». Testuinguru horretan, lurraldeko enpresak sostengatu nahi dituzte «lehiakorrak izaten jarrai dezaten eman behar diren aldaketak gauzatzen», besteak beste «fiskalitatean, azpiegituren sustapenean, politiken berrikuntzan, talentuaren kudeaketan eta ekonomia berriaren eta sektore estrategikoen sustapenean» lagunduta.

Ardatz horietako bakoitzean egin nahi dituztenak xeheago azaldu zituen Olanok; enpresak indartzeari dagokionez, esaterako, nabarmendu zuen planaren xedea dela «pertsonak eta euren ezagutza, garapen teknologikoa, lehiakortasunerako azpiegituren ekosistema eta nazioartekotzea sustatzea, enpresa txiki eta ertainak bultzatzea eta zailtasun egoeretan dauden enpresak laguntzea». Erantsi zuenez, «bere enpresak sendotzen dituen lurraldea lurralde indartsua da».

Enpleguaren kalitateaz, berriz, azpimarratu zuen beharrezkoa dela «garapen pertsonal zein profesionalerako pertsona ororen baldintza duinak bermatzea». Azkenik, jarduera ekonomiko berriak garatzearen alde mintzatu zen: «Egun dugun testuinguru aldakor honetan, funtsezkoa da politika berritzaile eta ausartak martxan jartzea. Horregatik, ekintzailetza, barne ekintzailetza, ekonomia zirkularra eta industria sortzaileak sustatzea proposatzen dugu».

«Bizitoki forma berriak»

Donostian, berriz, etxebizitzaz jardun zuen Eneko Goia EAJko alkategaiak Jolastokietan, eta «bizitoki forma berriak» proposatu zituen, adibide gisa jarrita udalaren lursailetan etxebizitza kooperatibak sortzea eta gazteei bideratutako etxe gehiago eraikitzea. Helburua: «Gazteek hemen [Donostian] garatu ahal izatea beren bizi proiektua». Horretarako, uste du «etxebizitza gehiago eraikitzeaz aparteko estrategia eta begirada berriak» txertatu behar direla.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Osakidetzako langile bat Txagorritxuko laborategi batean lanean. ©Gorka Rubio, Foku

Justizia Auzitegi Nagusiak ebatzi du Osakidetzak arriskuan jarri dituela langileak

Ainhoa Larretxea Agirre - Mikel P. Ansa

Osagileen sindikatuek jarri zuten salaketa, eta ekainaren 16an egin zuten epaiketa. ESK sindikatuak Nekane Murga Osasun sailburuaren eta Osakidetzako zuzendaritzaren dimisioa eskatu du. Osakidetzak, ordea, «positibotzat» jo du ebazpena, epaileak atzera bota dituelako sindikatuen «eskari gehienak».

Jendea paseoan, konfinamendua arintzeko lehen fasean. ©JON URBE/ FOKU

Jaurlaritzak ziurtatu du COVID-19aren agerraldiak «kontrolatuta» daudela

Irati Urdalleta Lete

Beste hamalau positibo eta hiru hildako daude. Jaurlaritzak pentsatu du neurriak areagotuko dituela jende pilaketak «mantenduz eta orokortuz» gero

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna