Albistea entzun

Koronabirusa

Ziurtagiria baldintza gisa

Gaurtik aitzina, osasun ziurtagiria ezinbestekoa izanen da Ipar Euskal Herrian kultur eta aisialdi jardueretarako. Arlo horietako eragile batek baino gehiagok informazio falta deitoratu dute.
Mugikorrean eraman daiteke osasun ziurtagiriaren QR kodea.
Mugikorrean eraman daiteke osasun ziurtagiriaren QR kodea. BERRIA Tamaina handiagoan ikusi

Ekhi Erremundegi Beloki -

2021eko uztailak 21

Zinemara joatea, ikusgarri parkeko igerilekura salto egitea, museo bat edo bestelako leku turistiko bat bisitatzea, ikusgarri batera joatea... Gaurtik aitzina, ez da erabat librea izanen Lapurdin, Nafarroa Beherean eta Zuberoan. 50 pertsonaren muga gainditzen duten espazioetara sartzeko derrigorrezkoa izanen da osasun ziurtagiria eramatea. Gabriel Attal Frantziako Gobernuko bozeramaileak erran du «malgutasunez» jokatuko dutela, baina arrangurak eta buruhausteak eragin dizkie neurriak kultur eta aisialdi guneetako arduradun andanari. «Ez dugu informaziorik, prentsan agertzen denaz aparte. Ez dugu informazio ofizialik jaso», aitortu du Nicolas Martin Ipar Euskal Herriko turismo bulegoko zuzendariak. «Eragile anitzek agertu digute kezka ea nola kudeatuko duten. Ez da haien lana, eta ez dakite nola eginen duten».

Uztailaren 12an iragarri zuen Emmanuel Macron Frantziako presidenteak osasun ziurtagiriaren hedapena. Gaurtik aitzina, kultur eta aisialdi guneetan aplikatuko da; agorriletik aitzina, ostatu, jatetxe eta distantzia luzeetako garraiobideetan ezarriko dute. 12 urtetik gorako herritar orok erakutsi beharko du ziurtagiria; hau da, baldintza hauetako bat bete beharko du: koronabirusaren kontrako txertoaren bi dosiak hartuak izatea, 48 ordu baino gutxiagoko test negatibo baten ziurtagiria erakustea —PCRak edo antigeno testek balio dute—, edo azken sei hilabeteetan koronabirusean positibo eman izana frogatzea.

Astelehenean onartu zuten ziurtagiriaren aplikazioa hedatzeko lege proiektua Frantziako ministroen kontseiluan, eta gaur eta bihar eztabaidatuko dute Frantziako Asanblean eta Senatuan. Ostiralerako izan beharko litzateke behin betiko bozketa. Frantziako Estatu Kontseiluak ontzat eman zuen lege proiektua joan den astelehenean, zehaztapen batzuekin: gehiegizkoa iruditu zaio, adibidez, osasun ziurtagiria 20.000 metro koadro baino gehiagoko supermerkatu eta denda handietan erakutsi behar izatea, eta bezeroek osasun ziurtagiririk duten ala ez kontrolatzen ez dutenei 45.000 euroko isuna jartzea ere handiegia iruditu zaio.

Orain, tokietako arduradunen esku da agindua gauzatzea, eta batek baino gehiagok adierazi dute ez dutela batere argi nola jokatu. «Eskualdeko Osasun Agentziara deitu dut goizean, informazio eske. Parlamentuan lege proiektua onartua ez deno, ez dakigu nola egin behar dugun», esplikatu du Bidarteko (Lapurdi) Bid'a Parc ikusgarri parkeko arduradunak. «Nola kontrolatuko dugu? Zeren bidez? Nola eginen dugu QR kodea egiaztatzeko? Zer baliabiderekin? Orria begiratzea aski da? Eta testak? Nortasun agiria kontrolatu behar dugu? Berez ez dut horretarako eskubiderik. Zein da protokoloa?», zerrendatu du.

Gainera, zehaztu du parkeko langile guziek hartua dutela txertoa, eta ez dela berez neurriaren kontra, baina behin eta berriz errepikatu ditu egun hauetan itzulika dituen galderak: «Gure parkea aire zabalean da; guri ere badagokigu neurria?». Haren hitzetan, egunero ehunka dei, mezu elektroniko eta mota guzietako mezu jasotzen ari da bezeroengandik galderak eginez. «PCR testa egitea ez da hain erraza; anitzek txertoaren lehen dosia baizik ez dute hartu, eta ezin ditugu antigeno testak guhaurek egin. Ez digute baliabiderik ematen. Bederatzi hilabete pasatu ditugu itxiak, sasoi betean gara; nola eginen dugu? Bordela izanen da».

Batzuek, bertan behera

Sarako (Lapurdi) leizeetan argiago dute: sarreran langile bat ezarriko dute ziurtagiriak kontrolatzeko. Besterik ez. Baina gunera sartzeko ziurtagiria erakustea derrigorrezko izateak eraginak izan ditu haientzat ere: erreserba egina zuten bezero batzuek bertan behera utzi dute bisita.

Kezka hori dute Errobiko Festibalaren arduradunek ere. Iaz ezin izan zuten festibala antolatu osasun egoeragatik, eta aurten ez dute huts egin nahi izan: bihar hasiko da ekitaldia. Ohiko publikoari zuzendutako gutun batean, beren jarrera argitu dute: «Festibala ezin dugu antolatu gutxieneko osasun neurriak errespetatu gabe. Amore eman eta bertan behera uztea errazagoa izanen zen, baina festibala atxikitzea erabaki dugu, osasun ziurtagiriak sortzen dituen baldintza zailetan».

Antolatzaileen artean eztabaida izan dutela esplikatu du Julen Axiari festibaleko zuzendari artistikoak: «Uste dugu jendeen arteko harremanak eta lotura soziala direla garrantzitsuena, eta baita gure bizian artea izatea ere. Behar ditugu musika, dantza, jendeen artean elkartzea, adiskideekin egotea.... Bizitza normala. Hori zen guretzat inportanteena».

Osasun ziurtagiririk gabe pentsatu zuten asteburu honetan Urrüstoi-Arrabilen (Zuberoa) iragatekoa den Abdelkader pastorala ere. Egun gutxian antolatu behar izan dute berriz ere dena, eta Pirinio Atlantikoetako Prefeturaren oniritzia jaso du ezarri duten antolaketa berriak. Hori horrela, erizain talde bat osatu da, laguntzaile gisa, tokian berean antigeno testak egiteko, baina ahal den heinean norberak bere kabuz egitera deitu dute. Ohartarazi dute testa egitea errefusatuko duenari ez diotela sarreraren dirua itzuliko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Mila positiboen langatik gora gaur berriz Hegoaldean: 1.077 izan dira

Mila positiboen langatik gora gaur berriz Hegoaldean: 1.077 izan dira

Arantxa Iraola

Osasunbideak eta Osakidetzak atzo egindako testetatik %11,8 izan ziren positiboak

Zaldibar Argituren protesta martxoan ©Monika del Valle / Foku

Herri akusazio gisa «baztertu» dituztela salatu dute Zaldibar Argitu-k eta Gizarte Eskubideen Gutunak

Berria

Bi elkarteek argudiatu dute herritar moduan herri akusazio gisa aurkezteko eskubidea dutela, auzian «argitu gabeko kontu ugari daudelako». Horregatik uste dute ez dagoela «benetan zer gertatu zen argitzeko» interesik.

DHEren protesta bat, eutanasia legeztatzearen alde, Bilbon. ©Marisol Ramirez/FOKU

Hegoaldean egindako lehen eutanasia kasuaren berri eman dute

Maria Ortega Zubiate

DHE elkarteak jakinarazi du. Osakidetza beste bi kasu aztertzen ari dela adierazi dute.

Motorzale bat, artxiboko irudi batean. ©EFE

Motorzale bat hil da istripu batean, Zuian

Berria

Errepidetik irten da motorra, eta bidea itxi behar izan dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna