Svante Paaborentzat Medikuntzako Nobel saria

Svante Paabo biologo eta ikertzaile suediarrak «giza eboluzioari dagokionez» inoiz egin gabeko aurkikuntzak egin ditu, eta Medikuntzako Nobel saria eman zion atzo Stockholmeko Karolinska institutuak. 916.000 euro jasoko ditu Paabok, sariarekin batera. Ikerlari horren aurkikuntzen artean daude, bertzeak bertze, neandertalen genoma sekuentziatzea —espezie hori desagertua da—, eta ezezaguna zen hominido bat deskubritzea.

Paabok ondorioztatu du, gainera, hominido horien geneak Homo sapiens-aripasatu zitzaizkiola duela 70.000 urte. Hori garrantzitsua da, adibidez, gaur egun gizakiaren immunitate sistemak infekzioei nola eragiten dien aztertzeko.

Karolinska institutuaren erranetan, Paaboren aurkikuntzek aunitz lagundu dute komunitate zientifikoan, gizakiaren inguruko jakintza hobetzeko. «Haren aurkikuntzek oinarria ematen dute gizaki berezi egiten gaituena ustiatzeko», adierazi zuten.

Medikuntzako Nobel saria izan da banatu den lehenbizikoa. Datozen egunetan jakinaraziko dira gainerako kategorietako irabazleak —kimika, literatura, bakea eta ekonomia, hurrenez hurren—.

Medikuntzako saria

Medikuntzako 113 Nobel sari banatu dira 1901 eta 2022 bitarte, eta saritu horietatik hamabi bakarrik izan dira emakumeak. Frederick G. Banting izan da historian sari hori jaso duen pertsonarik gazteena: 32 urterekin saritu zuten, 1923. urtean, intsulina asmatzeagatik. Peyton Rous izan da saria irabazi duen zaharrena: 87 urterekin saritu zuten 1966an, minbizia batzuetan eragiteko orduan birusek zer garrantzi duten deskubritzeagatik.