Elikadura. Errezeta

Barbarin arraintxoak plantxan, leka eta otarrainskekin

JON URBE / ARGAZKI PRESS

Iker Markinez -

2012ko azaroak 10
OSAGAIAK

4 pertsonarentzako osagaiak:

Dozena bat barbarin

300 g leka

2 dozena otarrainxka

2 baratxuri ale

Oliba olio birjina

Gatza

Perrexila

Barbarinak arrandegian erostean, hezurra ongi kentzeko eskatu, gero gure lana errazteko. Lekak garbitu, eta erditik moztu. Lapiko bat urez beteta irakiten jarri, su bizian. Irakiten hastean lekak bertara bota, eta 15 minutuz irakiten eduki, ur hotzetik pasa eta gorde.

Otarrainskei buru eta gorputzak zuritu, eta erditik moztu. Baratxuriak ere zuritu, eta pusketa txikietan moztu horiek ere.

Zartagin bat sutan berotzen jarri (oliorik gabe), eta, berotzen den bitartean, barbarinak gatzatuko ditugu. Zartagina ondo beroa dagoenean, barbarin xerrak bertan jarri, azala zartagin aldera begira dutela.

Geroago, olio zorrotada fin bat bota, eta pare bat minutu pasa ondoren buelta eman xerrei, kontu handiz; eta beste 2 minutuz frijitu. Ondoren, erretilu batera pasa, eta gauza bera egin barbarin xerra guztiekin.

Jarraian, baratxuri txikitua zartagin berera bota, baita otarrainskak ere. Olio zorrotada bota, eta pare bat minutuz mantendu. Lekak gehitu, baita perrexil xehatua ere. 3 edo 4 minutuz dena ongi nahastu, eta erretiluan ditugun barbarinen gainera irauli.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna