AIk «estatu mailako» lege bat eskatu du tortura ikertzeko

MADRIL. Eusko Legebiltzarraren Polizia gehiegikerien legeari PPren gobernuak jarritako helegitea atzera bota zuen PSOErenak joan den astean. Amnesty Internationalek (AI) horri buruzko balorazio positiboa egin du, elkartearen ustez «Euskal Herrian izandako torturaren aitorpenean aurrerapausoa» delako. Dena den, tratu txarren eta torturen biktimen eskubide guztiak bermatzeko «estatu mailako» lege bat eskatu du. Amnesty Internationalen ustez, eskubide guztiak bermatzeko lege bat behar dute biktima horiek, baita zuzenbiderako sarbidea eta erreparaziorako eskubidea ere, muga geografiko eta denborazkorik gabe. AIk gaineratu du Euskal Herrian izandako torturaren biktimak ez direla nazioarteko zuzenbideak agindu bezala hartzen.

Eusko Jaurlaritzak araua aldatzeko konpromisoa hartu du, eta azpimarratu aldaketaren helburua ez dela erantzuleak bilatzea izango, biktimen aitortza egitea baizik. Eusko Legebiltzarrak bezala, Nafarroako Parlamentuak ere egin zuen lege bat, 2015ean, eta Auzitegi Konstituzionalak baliogabe utzi du. Geroa Baiko parlamentari eta Nafarroako EAJko presidente Unai Hualdek adierazi du Nafarroako legea «salbatzeko» EAEko legean egindako aldaketak aztertuko dituztela, «formula berriak» bilatu eta Nafarroara egokitzeko.