Hauexek dira aste honetako gaiak: 1. Giza harremanen garrantzia kazetaritzan. 2. Gaur8-k 1.000. zenbakia kaleratuko du urriaren 17an. 3. 2026ko Euskarabildua: Adimen artifiziala herriaren zerbitzura. 4. Lapurretaren onarpena. 5. Adimen artifizialaren arriskua hizpide.

Babacar Welleren hilketa du hizpide Berriketan saioaren atal honek. Irailaren 28an hiru tiro egin zizkion udaltzain batek Hondarribian (Gipuzkoa), eta justizia eske karrikara atera da senegaldar komunitatea. Hondarribian gertatutakoa kontatu digu Isabel Jaurena BERRIAko Gizarte saileko koordinatzaileak, eta hilketa horren testuingurua azaldu digu Mikel Henda Gomez de Segura afroeuskalherritar, filosofo eta aktibista antirrazistak.

Etxebizitzaren auzia du hizpide Berriketan saioaren atal honek. Espainiako Gobernuak bi dekretu onartu ditu, eta ostiralean ikusiko da Diputatuen Kongresuak babesten ote dituen. Etxebizitzaren krisiari aurre egiteko neurri sorta bat da, eta litekeena da maizterren alokairu kontratuak automatikoki berritzeko aukera bertan behera gelditzea EAJ eta Junts alderdiak «etxejabe txikiak babesteko» asmoa agertu baitute. Paulo Ostolaza BERRIAko etxebizitza gaietako kazetariak azaldu digu dekretuetan jaso dutena, baita Erandion, Donostian eta Iruñean inbertsio funtsen mesedetan etxebizitza gal dezaketen 1.100 familia baino gehiagoren egoera ere.

 

Nazio Batuen Erakundea du hizpide Berriketan saioaren atal honek. Irailaren 22tik 28ra iragan da NBEko Batzar Nagusiko eztabaida orokorra, eta diskurtso belizistak zein mehatxuak nagusitu dira oholtza gainean. Nazio Batuen Erakundearen helburuez, ezinez, gaur egungo egoeraz eta eztabaida orokorrak eman duenaz hitz egin digu Arantxa Elizegi Egilegor BERRIAko editoreak.

'Aranburu auziko' epaiketa du hizpide Berriketan saioaren atal honek. Talde neonazi bati lotutako lau lagun kondenatu dituzte krimen horrengatik; Loik Le Priol 26 urteko kartzela zigorrera kondenatu dute Arambururen hilketagatik, eta Romain Bouvier 19 urteko kartzela zigorrera, Aramburu hiltzen saiatzeagatik. Oihana Teyseyre Koskarat BERRIAko kazetaria Parisko Krimen Auzitegian izan da epaiketaren berri bertatik bertara ematen, eta han gertatutakoa kontatu digu.

Ostiral arratsaldea argi berezi batek hartu zuen New Yorken. Ametsetakoa zirudien. Urrezkoa, laranja, gorria. Aurreko egunetako ilunabarrak ere ikusgarriak izan ziren, baina hark bazuen beste zerbait. Ez zuen lasaitasuna transmititzen, ezinegona baizik. Hain zen ederra, ezen zerbait txarra ekarriko zuela baitzirudien.
—Munduaren akabera datorrela ematen du —esan zidan espaloian zeruari argazkia ateratzeko geratu zen emakume batek.
Ez zen bakarra. Hiriaren abiadura geldiarazi zuen argi hark.
Asteburuan The New York Times-en David Wallace-Wellsi irakurritako artikulu batekin gogoratu nintzen. Ez ote garen apokalipsian gehiegi pentsatzen ari zioen: klima aldaketa, COVIDa, hirugarren mundu gerra, eta orain adimen artifizialaren mehatxua.
Ez zien mehatxu horiei garrantzirik kentzen. Galdera beste bat zen: zer gertatzen zaigu etorkizuna irudikatzen dugunean hondamendia besterik ikusten ez badugu?
Zer ari gara gazteei transmititzen? Mundua amaitzear dagoela, ez dagoela etorkizunik; eta, gainera, ez dakitela ez irakurtzen ez idazten.
Esan genezake, ordea, gauzak aldatzeko aukerak badaudela. Garaipen zibil eta sozialei esker mundua gauza askotan hobetu dela. Eta, bai, badagoela oraindik hobeto egiteko aukera.
Apokalipsiak beldurra sortzen du, eta beldurrak geldiarazi egiten zaitu.
Gauza horiek buruan nituela, fantasiazko argi hura urtu egin zen eta gauak hartu zuen hiria.
Eta biharamuna ere iritsi zen, ezustean bezala.

Hauxe da aste honetako gai zerrenda: 1. Albistearen kontzeptua zabaltzen ari da. 2. Washingtongo eguzkia. 3. Hedabideak aipagai. 4. Irakurle gazteak helburu estrategiko gisa. 5. Adimen artifizialak izan dezakeen arriskuaren neurria.

Adimen artifizialaren arriskuak ditu hizpide Berriketan saioaren atal honek. AEBetako adimen artifizialeko enpresa handiek esan dute teknlogia horren garapena moteldu eta kontrolatu behar dela, hori egin ezean arriskuak handiak direlakoan. Jacob Coxon ingeniariaren hitzen ondoren gertatu da hori; Coxoenen arabera neurriak hartu ezean adimen artifizialak mundua eta gizateria amaiarazi ditzake. Jakes Goikoetxea BERRIAko kazetariak gai honen inguruko gako nagusiak azaldu dizkigu.

Udan zein udazken hasiera honetan plazaraturiko hainbat kantu berri enztungo ditugu MurMur-en. Honako musikari eta taldeen piezak enztungo ditugu, euren murmurio eta oihartzun: AimarZ eta Kiliki; Xarma Leone, Mentza, Ezezez, Zea Mays, Izaro, Amorante, Izaki Gardenak eta M. Lecrêpe.

Etxebizitza Gizarte Funtsa du hizpide Berriketan saioaren atal honek. Alokairuan «neurrizko prezioan» jartzeko 10.000 etxebizitza eraiki nahi ditu Eusko Jaurlaritzak zortzi urtean, eta horretarako «aliantza publiko-pribatuan» oinarritutako funts bat sortuko du. Etxebizitza horiek 25.000 eta 65.000 euro arteko soldatak dituztenentzat izanen dira. Paulo Ostolaza BERRIAko etxebizitza gaien arduradunak eman dizkigu funtsari buruzko xehetasunak.