G7koen goi bilera MIARRITZEN

Bederatzi kilometroko auto ilarak Irunen, Baionarako bidean

Gipuzkoako Foru Aldundiak hiru autobus linea kendu ditu astebururako, eta Nafarroako Gobernuak ibilgailu astunen zirkulazioa eten du. Bideoa: G7koen aurkako kontragailurraren bigarren eguna.

jon olano
2019ko abuztuaren 22a
15:52
Entzun

Eusko Jaurlaritzako Trafiko Zuzendaritzak jakinarazi duenez, bederatzi kilometroko auto ilarak sortu dira AP-8 errepidean Irunen (Gipuzkoa), Baionarako noranzkoan. Udako oporretako itzuleraz gain, G7koak Miarritzen (Lapurdi) egitekoak diren goi bileraren eraginez Poliziak ezarritako kontrolak ari dira buxadurak eragiten. Egunotan ere izan dira ilarak, baina puntu horretan zazpi kilometrokoak izan dira azken egunetako luzeenak.

Autobidea saihesteko, beste errepide batzuk lehenetsi dituzte auto gidariek, eta Gi-636 errepidean ere sortu dira ilarak; arratsaldeko zazpietan, lau kilometrokoak izan dira buxadurak Irunen, Baionarako noranzkoan.

Bilera larunbatetik astelehenera bitartean izango da, Miarritzen, baina jada oztopoak eragiten ari da inguruko errepideetan. Horren harira, Nafarroako Gobernuak jakinarazi du 7,5 tonatik gorako ibilgailuak bihartik astelehen arratsaldera bitartean ezingo direla joan Nafarroatik Ipar Euskal Herrira, kamioiak ez daitezen errepidean pilatu.

Hiru linea, bertan behera

Gipuzkoako Foru Aldundiak jakinarazi du bihartik astelehenera bitartean bertan behera utziko dituela Lurraldebusen hiru linea: E-21 Hondarribia (Aireportua)-Donostia (AP-8), E-22 Hondarribia-Irun (CC Txingudi merkataritza gunea) eta E-28 Hondarribia (Ama Guadalupekoa)-Aireportua.

Rafaela Romero Mugikortasun diputatuak azaldu du G7koen goi bilerak sor ditzakeen eragozpenek ezinezko egiten dutela hiru linea horiek beren ibilbidea normal egitea. Horrez gain, trena lehenesteko eskatu dute, mugikortasun arazoek eragina izan dezaketelako beste autobus zerbitzu batzuetan.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.