LABek uste du greba indargabetzeko saioek porrot egingo dutela

Bederatzi egun geratzen dira Euskal Herriko Eskubide Sozialen Gutunak deituriko greba orokorrerako, eta, horko kide den LABen arabera, «jarrerak argitzen» eta «motorrak berotzen» ari dira. Garbiñe Aranburu idazkari nagusiak salatu du «kapitalaren interesak defendatzen» ari diren alderdi eta sindikatuak ahalegina egiten ari direla hilaren 30eko greba orokorra «indargabetzeko, gutxiesteko eta boikotatzeko». Jarrera horien atzean «urduritasuna eta ezinegona» daudela azpimarratu du. «Bide onean goazela pentsatzera eramaten gaitu horrek».

Hilaren 30eko mobilizazioa «arrakastatsua» izango dela uste du Aranburuk. 1.200 enpresatako langile batzordeek bat egin izanak —hemen esanguratsuenak— eta Hego Euskal Herriko herri eta auzoetan 171 batzorde osatu izanak erakusten du deialdiak «ilusioa» piztu duela.

Lantoki batzuetan, grebaren aurka dauden CCOO eta UGTko delegatuek «bat egin dute edo ez dira aurka azaldu», Aranbururen arabera. «Aldarrikapenen zerrenda ikusita, zaila dute ezezkoa ematea». Eta aurreko grebetan baino batzorde gehiago osatu dira herrietan; lantalde horien «aniztasuna» azpimarratu LABeko buruzagiak: «Langileak, pentsiodunak, ikasleak, emakumeak, migratzaileak... Langile klasearen batasuna gertatzen ari da. Eskuz esku ari gara lanean».

Mespretxua eta aitzakiak

Greba deialdiaren inguruko balorazioa egiteko, prentsaurreko bat egin du Aranburuk, Maider Jauregi komunikazio idazkariarekin batera, Donostian. Kazetarien galderei erantzunez, Iñigo Urkullu Eusko Jaurlaritzako lehendakariak eta Ahal Dugu alderdiak grebaren aurka esandakoei erantzun die.

Urkulluk uko egin dio grebara deitu duten sindikatuekin biltzeari, eta horrek, Aranbururen arabera, agerian uzten du lehendakariak «gehiengo sindikal eta sozialari» dion «mespretxua». «Bera patronalarekin lerrokatu da; alfonbra gorria jartzen dio, eta argazkiak egiten ditu harekin egun batean eta bestean; aldiz, inoiz ez du tarterik eta borondaterik langileen interesak jasotzeko».

Ahal Dugu-ren erabakiari buruz, berriz, adierazi du «aitzakiak» baino ez direla alderdi horrek emandako argudioak, eta EAJren «logika neoliberalean txertatzea edo urtzea» leporatu dio. «Greba honek ez dio erantzuten hauteskundeei begirako logika bati —Ahal Dugu-k eta beste batzuek salatu duten moduan—; langile borrokan mugarri berri bat izan nahi du».

Mugarri bat

Hain justu, ideia hori azpimarratu du Aranburuk agerraldian. Hilaren 30eko greba orokorra elkarlan dinamika baten emaitza dela gogoratu du. «Mobilizazio sozial oso indartsu baten ostean iritsi gara hona, eta borroka ezberdinak bat eginez, aldarrikapen askotarikoen taula batekin».

«Erasorako» izaera duen greba bat dela berretsi du, «ez delako hilaren 30ean amaitzen, 31tik aurrera borrokak jarraitzen duelako, mugarri bat jartzeko anbizioa duelako». Horrek «ilusioa» piztu duela azpimarratu du. «Geroz eta gehiago gara etsipenaren gainetik kalera atera nahi dugunak, eta eredu bidegabe onen kontra gaudenak eta bizitza duina eredu duen ekonomia bat defendatzen dugunak».