Abertzaleen emendatzea: lau auzapez

Itsasun, Urruñan, Ziburun eta Uztaritzen nagusitu dira, eta aliantza garailea sostengatu dute Hendaian eta Senperen. «Urteetako lan serios eta politaren» emaitzatzat jo du EH Baik.

Jendetza Ziburun, Eneko Aldanaren garaipena ospatzen.
Jendetza Ziburun, Eneko Aldanaren garaipena ospatzen. / Bob Edme Tamaina handiagoan ikusi

Jon O. Urain -

2020ko ekainak 28

Zerrenda abertzaleek garaipena lortu dute Ipar Euskal Herriko udal bozetako lau herriko etxetan, 2014an eskuratutako auzapez bakarrari beste hiru emendatuta.

Uztaritzen (Lapurdi), Bruno Karrere auzapezak beste sei urte emango ditu karguan, bera buru zuen Uztaritze Bai zerrendak 1.399 boto (%51,2) eskuratu eta gero. Karrere bera izan zen boz gehien bilduriko hautagaia martxoaren 15ean, lehen itzulian. Bruno Cendres Ensemble pour Ustaritz zerrendako hautagaiak %25 boto lortu ditu.

Abertzaleek, ordea, beste hiru herriko etxean izango dituzte aginte makilak; horietako bat izango da Eneko Aldana, datozen sei urteetarako Ziburuko auzapeza (Lapurdi). Ziburu Bizi 2020 zerrendako hautagaiak 1.340 boto eskuratu ditu (%44,7), Isabelle Dubarbier Ziburu Zuekin zerrendako hautagaiarekiko alde handiz (515 boto jaso ditu hark).

Itsasun (Lapurdi), bigarren itzulira bigarren postuan heldu zen Mikel Hiribarren, baina aurrea hartu dio Jean Paul Iturburuari; 519 boto bildu ditu (%42,2), eta hamabost botoren aldearekin nagusitu zaio Iturburuari. Duela lau egun, bi mila biztanleko herri batean politika egiteko maneraz, abertzaletasunaz eta euskaltasunaz mintzatu zen BERRIArekin, euskaldunak izateko batzuek duten «nekeari» azalpena eman nahian.

Urruñan (Lapurdi) ere nagusi izan da Filipe Aramendi zerrendaburu abertzalea; 2.175 boto (%45,9) jaso ditu Elgarrekin Urruña Berpiztu zerrendak, lehen itzulian lortutako abantaila handituta. Francis Gavilan Urruña Guzientzat hautagaitzako buruak, berriz, %27,9 boto lortu ditu.

Aliantza garailean Hendaian eta Senperen

Horiez gain, hautagai abertzaleak zerrenda garailean aurkeztu dira beste herri batzuetan ere; esaterako, Hendaian 2014an eginiko aliantzari segida eman diote aurten, eta Kotte Ezenarro auzapez sozialistak eutsi egingo dio karguari. Lehen indarra izan zen Ezenarro lehen itzulian, eta botoen %55,1 eskuratu du bigarrenean.

Senperen, berriz, Jean François Bederede hautagaiaren Senpere Bai zerrendarekin aliantza egin zuen Dominique Idiart Elgarrekin Senpererentzat zerrendako hautagaiak, eta hark irabazi ditu bozak; ehun botoren aldearekin baino gutxiagorekin nagusitu zaio Pierre Marie Nosbaumi.

EH Bai, pozik

Emaitzokin pozik agertu da EH Bai, hauteskunde emaitzen lehen balorazioan, eta gogoan izan dituzte auzapezak lortu dituzten herriak: «Urteetako lan serios eta politaren ostean, eta gaur lorturako boz kopuruen ondorioz, herriko etxeak irabazi dituzte. Gaurko emaitzak, urteetan zehar, abertzaleek tokian-tokian egindako lanaren uzta dira. Urtez urte, abertzaleen emaitzak etengabe indartuz doaz lehen mailako indar politiko gisa kokatuz eta gure proiektua indartuz».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

 ©BERRIA

COVID-19aren uste ustelak

Mikel P. Ansa

COVID-19aren pandemia ukatzen duten joera batzuek indarra hartu dute uda honetan. Haiek zabaldutako uste batzuk zeinen okerrak diren azaldu dute Miren Basaras eta Guillermo Quindos mikrobiologoek artikulu sorta honetan. Gaur, koronabirusaren larritasuna.

PCR probak Gurutzetako ospitalean. ©Luis Jauregialtzo / Foku

Koronabirusak iragan astean baino hamahiru hildako gutxiago utzi ditu

Uxue Rey Gorraiz

Koronabirusa zuten 59 pertsona hil dira astebetean, eta, hori dela eta, COVID-19aren ondorioz hildakoen kurba apalduz joan da azken astean. Beste 697 positibo atzeman dituzte egun batean

Jendea, maskara jantzita, Iruñeko Sarasate pasealekuan, uztailean. ©IÑIGO URIZ / FOKU

Espainiako Gobernuaren neurriek ez dute eraginen Hegoaldeko hirietan

Maddi Ane Txoperena Iribarren

Nafarroako Gobernuak eta Eusko Jaurlaritzak baiezkoa eman diote Madrilek hiriei jarritako murrizketen proposamenari. Remirezek ortziralean erranen du Nafarroako neurriak luzatuko ote dituen

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna