Egutegiaren efektuak inflazioaren gorakada ekarri du Espainian. INE estatistika erakundearen arabera, zortzi hamarren egin du gora urte arteko inflazioak, %3,3tik %4,1era.
Bi arrazoi eman ditu INEk horretarako. Lehena da iazko abenduan erregaiak merkatu egin zirela, orduan jarri baitzen indarrean Espainiako Gobernuak erregai litroari emandako deskontua, hogei eta 25 zentimo artekoa. Deskontu horrek gasolina nabarmen merkatu zuen iazko apirilean, eta halakorik ez da gertatu apiril honetan.
Hego Euskal Herrian, batez beste, 1,677 euro kostatu da gasolina litroa apirilean, eta 1,535 gasolioa. Deskontua kontuan hartuz gero, duela urtebeteko antzeko prezioak dira.
Bigarren arrazoia da argindarra ez dela merkatu 2022ko apirilean merkatu zen adina.
Kontrara, INEk aurreratu du elikagaiak eta edari ez-alkoholdunak aurtengo apirilean ez direla garestitu iazkoan bezainbeste. Elikagaiak %15etik gora garestitu dira azken urtean, baina igoera hori apaltzen hasiko dela uste du Espainiako Gobernuak.
Elikagai freskoak eta erregaiak kontuan hartzen ez dituen azpiko inflazioak, berriz, beherakada nabarmena izan du apirilean, oraindik oso handia bada ere. Zehazki, martxoko %7,5etik apirileko %6,6ra igaro da.
Maiatzaren 12an zabalduko ditu datuak INEk, eta orduan jakingo da zer gertatu den Hego Euskal Herrian ere. Martxoan %3,4koa izan zen, eta %15,8 elikagaiena.
