«Gaitzeko gibelapena bizitzen ari gara». Tonu aldarrikatzailea izan du Seaskak antolatu prentsaurrekoak gaur goizean Senpereko lakuan. Euskarak bizi duen gibelapena 2019ko baxoa aldatzeko Blanquer erreformak eragin duela zehaztu du Seaskako guraso Maite Duboisek. Izan ere, erreforma gauzatu aitzin lizeoko ikasleek baxoko matematikako froga euskaraz pasatzen ahal zuten. Erreformak euskarak irabazi lekuak «hankaz goiti» eman dituela nabarmendu du, errate baterako, egun baxoko matematikako azterketa euskaraz pasatzea debekatu baitu Frantziako Estatuak.
Egoera «zentzugabea eta ulertezina» zaio Duboisi, eta, horrenbestez, jendarte guziari dei egin dio matematikako etsaminaren inguruko egoera desblokeatzearen, eta oro har, azterketak euskaraz pasatzeko eskubidearen alde egiteko. «Euskaltzale guziei dei egiten diegu gurekin Bordelera joateko eta manifestazio zaratatsu eta jendetsua antolatzeko. Hautetsiek ere presioa egin dezatela egoera askatzeko: denen beharra dugu».
Ikusi gehiago
Nahiz eta 15.000 mezu baino gehiago igorri Frantziako Hezkuntza Ministerioari, 37 herriko etxek azterketak euskaraz pasatzeko mozioa sinatu eta 540 hautetsik hura sustengatu, Frantziako Estatua mutu gelditzen dela salatu du, eta bere jarrerari eusten diola. Bide beretik joan da Seaskako lehendakari Erik Etxart. Erran duenez, Paristik haize «txarra» heldu da, eta horri aurre egiteko jendarte osoaren laguntzaren behar «gorrian» da Seaska. «Badirudi Frantziako Estatuak aspaldi abiatu zuen politikak segitzen duela. Ipar Euskal Herrian euskaraz bizi nahi dugu, eta debekua emanez erantzuten digute».
Laku bat «orroka»
Eguzkia da nagusi Senpereko laku bazterretan, eta jendez gainezka dago Araba BERRIA gunea. Nork bere manera izaten du euskararen oldarraldiari orro egiteko eta aldarrikapenen kateari bere alea emateko. Errate baterako, Kattalin Indaburu urte guziz heldu da Herri Urratsera musika taldearekin jotzeko. «Biziki» hitzordu garrantzitsua zaio, Seaskak aldarrikapen «anitz» egin behar dituelako oraino. «Testuingurua ez da batere samurra, ez Euskal Herrian, ezta nazioartean ere. Hizkuntza minorizatuak desagertzen ari dira, eta euskarari dagokionez, nahiz eta leku gehiagotara heldu, egunerokoan ez dut aldaketa handirik ikusten». Beraz, euskararen pizkundea gerta dadin, Herri Urrats eta antzeko bestak beharrezkoak iruditzen zaizkio. «Euskaldunok hats har dezagun funtsezkoak dira horrelako bestak. Hemendik indartsu ateratzen gara gure borroka urte guzian eraman dezagun ondotik».
Alaitz Etxebeste Aire ttipidanik urte guziz heldu da Senpereko lakura. Besta eguna izateaz gain, kontziente da aldarrikapen egun baten parte ere badela. «Seaskaren aldeko besta handia sustengatzeko heldu naiz urte guziz, eta horren bidez euskararen alde egiten dugu lagunekin batera». Robin Gachis gurasoari berriz «ezinbertzekoa» zaio txanda egitea Herri Urratsen. Lehen aldia du, eta ilusioz jin dela kontatu du. Euskalduna ez izanik ere, euskararen alde egin du duela urte batzuk bere haurrak Seaskan emanez. «Ez naiz euskalduna, baina uste dut guri dagokigula guraso gisa haurrak murgiltze sisteman ematea. Nahiz guk ez dugun euskalduntzeko aukerarik izan, berma dezagun Euskal Herri euskaldun bat gure haurrak Seaskan emanez».
