Egin du hirugarren eguna Boiseko Jaialdiak, eta, lehen bi egunetan bezala, ez da aspertzeko tarterik izan. Goizean, ekitaldi instituzionala izan da Kapitolioan: Imanol Pradales Eusko Jaurlaritzako lehendakariak batzarra izan du Brad Little Idahoko gobernadorearekin, eta, ondoren, Kulturaren eta laguntasunaren ospakizuna zioen kartel baten aurrean hitz egin dute kazetarien aurrean. «Ez gara hutsetik hasi; bilera honen bidez, jarraipena eman diogu eta emango diogu harreman transatlantikoak sendotzeko helburuari», adierazi du lehendakariak.
Jarraian, Lauren McLean Boiseko alkateak harrera egin dio Pradalesi udaletxean. Adierazpen batzuk egin dituzte biek, eta ikurrina igotzea izan da bilkura horretako keinurik bereziena. Imanol Pradales lehendakariak ikurrina igo du Boiseko udaletxeko atarian, txistuaz eta panderoaz lagundurik eta inguruan bildu diren dozenaka eta dozenaka euskaldun eta bisitari ere kantuan jarrita.
Era berean, jaiak aurrera jarraitu du Basque Block gune nagusian ere. Eguerdirako, giroan murgilduta ziren asko, eta musika protagonista izan da behin baino gehiagotan. Arratsaldean, ohi bezala, pilota partidak izan dira Anduiza frontoian, eta jendeak hala eserita nola zutik ikusi ditu. Kanpoan, ilara amaigabeak sortu dira jana eta edana erosteko; ilararik luzeena, paella hartzeko.
Iluntzean, Idaho Central Arenara lekualdatu da ospakizuna, Sports Night gisa izendatu duten kirol erakustaldia zela eta. Ilara luzeak sortu dira hor ere, baina, Basque Block gunean ez bezala, bereziki ingelesa nabarmendu da. Deskribatzeko zaila da barnean zer geratu den: oihuak, txaloak, Gernikako arbola zuzenean ingelesez eta euskaraz, We Are the Champions kantuaren indarra, Kepa Junkeraren Bok Spok pieza ezaguna ozen bozgoragailuetatik… AEBetako kirol ekitaldien kutsu eta tonu popularra hartu du erakustaldiak, eta jaia piztu da: bertsolariak, aizkolariak, harri jasotzaileak, txingaren proba, lasto jaurtiketa; denetarik izan da, eta ikus-entzuleen jarrera aparta izan da.
Azkenik, Xabi Aburruzagaren eta Gatibu taldearen kontzertuek eman diote amaiera hirugarren eguneko egitarauari. Basque Block guneak hartzen dituen ehun metroak bete ditu jendeak, eta lehen ilaratik azkeneraino iritsi da sortu den grina.
