Aurtengo lehortea arazo ugari ekartzen ari zaie nekazariei, eta, esaterako, asko murriztu du abereen jana soro eta larreetan. Horretaz jakitun, Bazka Mahaia eratu zuen Eusko Jaurlaritzako Elikadurako, Landa Garapeneko, Nekazaritzako eta Arrantzako Sailak duela hilabete inguru, eta hark lehenengo erabakia hartu zuen abuztuaren 7an egindako bileran: abelburuentzako bazka batera erostea, horrela prezio hobeak lortu ahal izateko. Mahaian, Jaurlaritzak konpromisoa hartu zuen inkesta bat egiteko ustiategien artean, horien elikagai beharrak zeintzuk ziren jakite aldera.
Lursail kudeaketa zentroaren bitartez egin dute inkesta, eta, Jaurlaritzak jakinarazi duenez, prozesu hori dagoeneko amaitu dute. 435 ustiategik erantzun dute: Arabako 86k, Bizkaiko 160k eta Gipuzkoako 177k. Gainerako hamabiek ez dute zehaztu nongoak diren. Erantzun dutenetatik %43 haragitarako behi azienden ustiategiak dira, %14 esnetarako behi aziendenak, %13 ardi eta ahuntz aziendenak, %12 zaldi aziendenak, eta %18 abeltzaintza mistokoak.
Inkestaren bidez, euren beharren berri eman dute ustiategiek: zer produktu mota eta zenbat behar duten, eta zer formatutan, hau da, bazka soltean, fardo handiak, fardo txikiak edo zatikiak behar ote dituzten.
«Sektoreak erantzun egin du», adierazi du Amaia Barredo sailburuak. «Orain, askoz argazki zehatzagoa dugu gure ustiategien aparteko beharrei buruz».
Orain, negoziazioa
Barredok azaldu duenez, hurrengo urratsa izango da «informazio hori negoziazio gaitasun bihurtzea». Saila harremanetan jarriko da kooperatibekin eta elikagaien hornitzaileekin, eta egin beharreko eskaeraren zenbatekoa, behar dituzten elikagai motak, epeak eta abar negoziatuko dituzte. Sailaren asmoa da eskaera bateratua eginda prezio eta baldintza hobeak lortzea abeltzainentzat, eta, era berean, «tokiko ekoizpena lehenestea», bazka kanpotik ekarri ordez.
Bazka Mahaiak irailaren lehenengo astean egingo du hurrengo bilera, eta han lotuko dituzte erosketa bateratua egiteko azken xehetasunak.
