Lan istripu larri bat izan zen atzo Pasaiako portuan (Gipuzkoa). Zamalanak egiten ari zen kamioi batek zaintzaile bat harrapatu eta hil du. 19:45ean izan zen ezbeharra. 47 urte zituen langileak. UGT sindikatuak azaldu du ibilgailuekin aritzeko terminal intermodalean izan zela istripua, eta zaintza lanak egiten ari zela langilea. Zehaztu du zaintzaileek kamioiak eta merkantziak zaintzen dituztela hor, ez dadin polizoirik sartu. Gertatutakoa ikertzeko eta argitzeko eskatu die segurtasun enpresari eta terminaleko arduradunei.
LAB sindikatuak erantsi duenez, istripuaren berri izan orduko LABeko ordezkariek lana eten zuten, eta etxera bidali zituzten langileak. Gainera, erabaki dute gaur ere lanik ez egitea; bihar, berriz, elkarretaratzea egingo dute portuan bertan.
Urtarrila oraindik bukatu ez den arren, aurten lanean hil den bederatzigarren langilea da atzoko hori. Horiei beste bi heriotza ere gehitu behar zaizkie. Ostegunean, Ibarrako (Gipuzkoa) Voith Hydro enpresako langile bat hil zen Galizian, Enel konpainiaren zentral hidroelektriko batean lanean ari zela, makina batek harrapatuta. Eta, atzo, lanerako bidean hil zen behargin bat, auto istripuz, Tuteran.