Nazioarteko merkataritzaren tentsioak Hego Euskal Herriko enpresen esportazioetan islatu dira. Eustat eta Nastat estatistika erakundeek apiril arteko datuak eman dituzte. Lau lurraldeetako enpresek atzerrian saldutako produktu eta zerbitzuak %2 beheratu dira urteko lehen lau hilabeteetan, iazko datuekin alderatuta. Inportazioek, aldiz, %5 egin dute gora.
Dena den, kanpo merkataritzako balantzea positiboa da oraindik ere, euskal enpresek esportatutakoa atzerritik erositako salgaien bolumena baino 1.575 milioi euro handiagoa izan baita urtarriletik apirilera bitarte. Urtebetean %3,5 beheratu da alde hori.
Euskal enpresen merkatu nagusiak Alemania, Frantzia, Erresuma Batua eta Italia dira. Gasteizko Mercedesen eta Iruñeko Volkswagenen lantokietan ekoitzitako automobilak dira gehien esportatutako produktuak (3.431 milioi euro) eta hari loturik autogintzako osagaiak (610 milioi euro).
Inportazioei dagokienez, Alemaniatik inportatzen da produktu gehien, eta, ondoren, Txinatik. Autogintzatik inportatzen da produktu gehien, batik bat Alemaniatik.
