Aita Mari ontzi humanitarioak 2027ra atzeratuko du udazkenerako planifikatua zuen misioa, erregaien garestitzearen ondorioz. Mediterraneo erdialdera da joatekoa.
SMH Itsas Salbamendu Humanitarioak adierazi du misioaren hasierako aurrekontua lehen halako bi dela. Horri aurre egiteko, GKEak diru bilketa bat jarri du martxan, 30.000 euroko kostu gehigarria ordaindu ahal izateko.
Ormuzko itsasarteko tirabiren ondorioz erregaien kostuak gora besterik ez du egiten. Izan ere, Hego Euskal Herrian gasolinaren eta gasolioaren prezioek %25,6 egin dute gora urtebetean.
Sentsibilizazio kanpaina
Ez dira geldirik geratuko, ordea: azaroan, Menorcan, Mallorcan eta Valentzian (Herrialde Katalanak) sentsibilizazio kanpaina ibiltariak eta ateak irekitzeko egunak egingo dituzte.
Aita Mari ontzia 2017tik ari da nabigatzen, Mediterraneoa zeharkatzeko ahaleginean dabiltzan pertsonak erreskatatzeko. Misio ugari egin dituzte jada, eta datorrena hogeigarrena izango da.
