Egunak geroz eta beroagoak dira, eta gauean kasik ez du epeltzen. Alerta egoera dago Euskal Herri osoan, halako beroteek ekar ditzaketen ondorio larriengatik. Ipar Euskal Herrian asteazkenera arte iraun behar luke alarma gorriak, atzo eguerditik geroz ezar baitzuen Pirinio Atlantikoetako prefeturak; Eusko Jaurlaritzak, berriz, gaur ezarri du alarma gorria Araban, Bizkaian eta Gipuzkoan, eguerditik aitzina 20:00ak arte; Nafarroan, ordea, alerta laranjari eutsiko diote oraingoz.
Urgentziazko aterabideak lotu beharrez ari dira eskuin-ezker, hainbat azpiegitura ez baitira egokiak azken egunetako beroteak jasateko. Ipar Euskal Herrirako, aurreikusi dute balitekeela asteazkenera arte irautea hein horretako tenperaturek: 40 graduak gainditu zituzten atzo.
Hala, Baionako Herriko Etxeak ostiralean erabaki zuen hiriko 11 eskolaren hestea gaur eta bihar, hots, «berote handien denboran haurrei harrera egiten ahal ez dieten eraikinak». Eskola horietako haurrak Jean Dauger errugbi zelaiko gela klimatizatuetan aterpetuko dituzte, gurasoek ezin badituzte etxean zaindu.
Bideei dagokienez, gehienezko abiadura oreneko 20 kilometroz jaitsi dute Ipar Euskal Herrian alarma gorriak iraunen duen artean, airearen kutsadura mugatze aldera. Hondakindegiak hetsiak dira egun osoan, bestalde, «sute arriskua apaltzeko».
Hego Euskal Herrian bukatuak dira eskolak, baina jendeak lanean segitzen du. Gaur goizean, Euskal Autonomia Erkidegoko Lan Ikuskaritzak 3.000 enpresa baino gehiago ohartarazi ditu «bero boladek eragindako lan arriskuen inguruan». Udak kanpainari bultzada berria eman behar izan dio Ekonomia, Lan eta Enplegu Sailak, «estres termikoa prebenitzeko eta lan ingurune seguruak bermatzeko». Komunikazio berezituak bidali dizkiete Arabako 551 enpresari, Bizkaiko 1.576ri eta Gipuzkoako 936ri. Gogorarazi diete enpresek «legezko betebeharra» dutela langileen segurtasuna eta osasuna bermatzeko.
Bilbon, Pentsiodunen Mugimenduak elkarretaratzea egitekoa zuen gaur, 12:00etan, udaletxe aitzinean. Ordea, jakinarazi dute bertan behera geratuko dela kontzentrazioa, «egun hauetarako aurreikusitako tenperatura altuek kalteberak direnei —tartean adin jakin bateko pertsonentzat— dakarzkieten arriskuengatik». Datorren astelehenean elkartuko dira, hilaren 29an, «muturreko beste baldintza batzuek eragozten ez badute».
Eskolak bukatuak diren arren, zabalik jarraitzen dute haurreskola askok, eta horietan ere neurriak hartu dituzte Araba, Bizkai eta Gipuzkoan. Gelak lehenago istea erabaki du Haurreskolen Partzuergoak, 13:00etan, modu horretan eguneko ordu beroenak saihesteko. Erabakiagaur bertan sartu da indarrean eta hala jarrituko du tenperaturak jaiste ez diren bitartean. Partzuergoak berak azaldu duenez, helburua da «haurren nahiz langileen ongizatea bermazea».
Orokorrean, autoritateek «arduraz jokatzea» galdegin diete herritarrei: egarririk izan gabe ere ura edatea, tenorerik beroenetan ez ateratzea, ariketa fisikorik ez egitea, ahulak diren hurbilekoen berri hartzea...
Bero sapa asteazkenera arte
Eguraldia ez da berehala epelduko. Biharko, astearterako, alarma gorriari eutsi dio Frantziako meteorologia agentziak Lapurdin, Nafarroa Beherean eta Zuberoan, 40 gradu inguruko tenperatura maximoak espero baitira. Eusko Jaurlaritzak beste hainbeste egin du: alarma gorria 12:00etatik 20:00etara, laranja eguneko gainerako orduetan, eta abisu horia basoetan suteak pizteko arriskuagatik, egun osoan zehar. Asteazkenerako ere alarma gorria eman du Jaurlaritzak eguerditik iluntzera. Aemet Espainiako meteorologia agentziak, berriz, alerta laranja eman du Nafarroan datozen egunetarako. Espero da asteazkenean ere 35 gradutik gorako tenperaturak izatea eta ostegunean giroa freskatzea.
