Aste honetan jakinarazi dute Arantza Baigorri Zaldibarko alkate ohia (EH Bildu) eta udaleko hiru teknikari inputatu dituztela Zaldibarko zabortegiaren auzian, lurralde antolaketaren kontrako delituak egitea egotzita, enpresa zabortegian egiten ari zen jardueren berri ez emateagatik. Orain, Zaldibar Argitu plataformak iritzia plazaratu du: esan duenez, Baigorriri egozten diotena «hark eta haren alderdiak» azaldu beharko dute, baina, plataformaren iritziz, benetako gakoa da «langile biren zuhurtziagabekeriazko homizidioa eta ingurumen kalte ikaragarria eragin zuten faktoreak ikertu eta erantzukizunak zehaztea», hots, «zabortegiaren tramitazioan izandako irregulartasunak, Jaurlaritzaren arduragabekeria ikuskaritzan, ustiaketan izandako irregulartasunak, eta abar». Zaldibar Argituk dioenez, «oraingo filtrazioa ez doa norabide horretan».
Plataformak esan du ohiko bilakatu dela albiste eta filtrazioren bat egotea «hondamendiaren urteurrena hurbildu ahala». Orain, Baigorriren inputazioaren albistea izan da: «Ez dakigun norbaitek zabaldua». Horren harira, plataformak esan du «harrigarri» begitantzen zaiola Juan Maria Uriarte alkateorde izandakoa eta Jose Luis Maiztegi alkate ohia (EAJ) ikertu moduan ez agertzea: «Zabortegia bultzatu eta sostengatu zuten hainbat udal agintariren erantzukizunak ez ikertzeko asmo nabarmenegia» sumatzen du plataformak.
Berretsi egin du aferaren inguruko «guztia» argitzeko eskaera: «Gure arreta desbideratzeko ahaleginak antzuak izango dira». Dei egin dute otsailaren 8an egingo duten ekitaldira joateko.
