Atxiloaldia luzatu zioten, baina, azkenean, libre utzi dute atzo goizean Biriatun atxilotutako militante politikoa, kargurik gabe.
Gaur goizean, jadanik, Mariel Garrigos Baionako prokuradoreak zenbait argibide eman zituen aferaz: «Baiezta dezaket [atzo] goizean atxilotu genuela eta zaintzapean atxiki, sare sozialetan bideo bat zabalduz terrorismoaren gorazarre egin izanarekin loturik egon daitezkeen egitateengatik». Atxiloaldia luzatu zioten, eta gaur bertan erabakitzekoa zuten prozeduran zer urrats egin.
Azkenerako, kargurik gabe utzi dute gizona aske; atxiloaldiari lotua zaion berezko ikerketa besterik ez dute bururaino eramanen.
Frantziako Poliziak atzo goizean atxilotu zuen militante politikoa, Biriatun (Lapurdi). Baieztatu dutenez, gizonaren bikotekidea atzo arratsaldean deklaratzera deitu zuten.
Gizon gaztea Urruñakoa da jatorriz, herriko ikastolako irakaslea. Hain zuzen ere, Urruñako ikastolako irakasleek, langileek eta bulegoak «elkartasun osoa» adierazi zioten atzo ohar batean, eta elkarretaratzera deitu zuten Urruñako pilota plazan, 17:30ean.
Larunbatean, manifestazioa egin zuten Baionan hainbat kolektibok deituta, azken hilabeteetako errepresioa salatzeko. «Gure borroka ildoak segitu eta kolektiboki indartuko ditugu, hori baita, azken finean, erantzunik hoberena errepresioaren aurka», adierazi zuten.
