Iazko otsailaren 13an, Tolosako inauterietan izandako istiluetan Xuhar Pazosek zauri larriak izan zituen begian, ertzainen foam jaurtigailu batek eraginda. Auzibide hura argitzeko dago oraindik. Azaroaren 17an deklaratuko du Pazosek, Tolosako auzitegian (Gipuzkoa).
2024ko azaroan, auzia artxibatu egin zuen epaileak, baina 2025eko irailean berriz ere kasua irekitzeko agindua eman zion Gipuzkoako Probintzia Auzitegiak Tolosako 1. Instrukzio Epaitegiari. Izan ere, auzia ikertu gabe itxi zutela salatu zuen Aiert Larrarte abokatuak. Auzi honetarako, lehen ez bezala, Pazosi deklarazioa hartuko dio epaileak. Horrez gain, inguruan zeudenen lekukotzak jasotzeko eta gertaerak nola izan ziren aztertzeko eskatuko dio defentsak epaileari. Ikusteko dago eskaera horiek onartuko dituen.
Pazosi elkartasuna adierazteko mobilizazioa antolatu du Xuhar herri plataformak azaroaren 17an, 10:30ean, Tolosako auzitegiaren aurrean, han deklaratuko baitu gazte billabonatarrak.
